Выбух у найбуйнейшым горадзе Пакістану Карачы ды баі ў правінцыі Бэлуджыстан.
У ноч на 9 чэрвеня ў горадзе Карачы прагрымеў выбух – на лётнішча напалі баевікі. Адказнасць за выбух, у выніку якога загінулі больш за 20 асобаў, ужо узяў на сябе рух «Талібан» (ісламскі рух суніцкае традыцыі). Паводле пакістанскіх вайскоўцаў, баевікі планавалі захапіць авіяангары ды знішчыць самалёты.
«Мы здзейснілі напад на аэрапорт у Карачы – гэта напамін пакістанскаму ўраду пра тое, што мы ўсё яшчэ жывыя і гатовыя адрэагаваць на забойствы нявінных людзей у ходзе бамбаванняў іхных вёсак», – цытуе прадстаўніка «Талібану» Шахідулу Шахіда (Shahidullah Shahid) агенцтва «Reuters».
Між тым пакістанскія вайскоўцы ў панядзелак раніцаю паведамілі пра сканчэнне аперацыі супраць баевікоў, якая доўжылася прыблізна 12 гадзінаў. Паводле апошніх звестак, падчас нападу загінулі 27 чалавек, у тым ліку 10 баевікоў. Супрацоўнікі спецслужбаў і вайскоўцы акалілі аэрапорт і перакрылі бліжэйшыя дарогі. Усе рэйсы перакіроўваюцца ў іншыя гарады, персанал лётнішча і пасажыраў эвакуявалі.
У дзень тэракту ў Карачы суніцкія баевікі здзейснілі напад на шыіцкіх паломнікаў ля гораду Тафтан (правінцыя Бэлуджыстану недалёка ад мяжы з Іранам). 22 асобы загінулі, некалькі дзясяткаў параненыя.
75 % пакістанскіх мусульманаў суніты, 20 % шыіты.