Сумневаў не мае ніхто. Пятрo Парашэнка стане пятым кіраўніком Украіны. Выбраны прэзідэнт паспеў ужо зрабіць першыя заявы. Чаго чакаць ад «салодкага» алігарха?
Прыярытэтам замежнай палітыкі будзе еўраінтэграцыя, унутранай – барацьба з карупцыяй, стварэнне незалежнай судовай сістэмы і развязанне крымскага пытання. Арсеній Яцэнюк захавае пасаду і застанецца прэм’ер-міністрам. Парашэнка паабяцаў мірным жыхарам Данбасу пачаць дыялог. Аднак антытэрарыстычная аперацыя будзе працягвацца. Сустрэча Парашэнкі з Пуціным можа адбыцца ўжо ў сярэдзіне чэрвеня.
{movie}Хто такі Пятро Парашэнка і куды ён можа завесці Украіну? |right|16646{/movie}
Пятра Парашэнку называюць адным з заснавальнікаў Партыі рэгіёнаў. Аднак, паводле сацыёлага Юрыя Тарана, калі Парашэнка закладаў у 2001 годзе гэтую партыю, яна не была партыяй Віктара Януковіча ў поўным сэнсе.
«Пятро Парашэнка ніколі ў гісторыі існавання Украіны яшчэ не паказаў сябе як антыкрызісны або паспяховы менеджар. Гэты чалавек разумее, дзе ўлада, і ўмее з уладаю дамаўляцца. Але ў той жа час, ці здолее ён сам быць тою ўладаю?» – заўважыў сацыёлаг.
Данбас мусіць прыняць Парашэнку як свайго прэзідэнта, бо не мае выбару, мяркуе спадар Таран. «Данбас – гэта настолькі няшчасны рэгіён у гэтым плане. Яму ўвесь час не шанцуе з тым, што выбіраюць нібы яго кандыдата, а пазней аказваецца, што гэта не яго кандыдат, як было з Кучмаю ці Януковічам. Выбіраюць не яго кандыдата – яму зноў дрэнна», – лічыць эксперт.
Ён падкрэсліў, што Данбас вельмі слаба інтэграваны ва Украіну ментальна і паддаецца расейскай прапагандзе. Калі ж Парашэнка з’явіцца на Данбасе, куды плануе свой першы візіт у якасці прэзідэнта, то, хутчэй за ўсё, выкліча непрыняцце, заўважыў адмыслоўца. «Як ён можа туды заявіцца? Толькі калі антытэрарыстычная аперацыя будзе паспяхова скончаная, а гэта азначае ахвяры і кроў».
Больш – у відэаматэрыяле.
МЯ, belsat.eu