Яна стане часткаю адроджанага Музею ахвяраў палітычных рэпрэсіяў, першая экспазіцыя якога адкрылася ў Бабруйску 19 траўня.
Аднавіць Музей ахвяраў палітычных рэпрэсіяў прапанавала бабруйская актывістка Вольга Піманава яшчэ летась увосень, на вечарыне памяці ахвяраў рэпрэсіяў. Яна ж збірала матэрыялы і рыхтавала экспазіцыю.
{movie}Музей ахвряаў рэпрсэсіяў у Бабруйску. Відэа “Бабруйскі кур’ер”|right|16517{/movie}
На адкрыцці музею спадарыня Піманава правяла першую экскурсію па экспазіцыі, распавяла пра месцы ў Бабруйску, дзе ў 30-я гады ХХ стагоддзя праходзілі масавыя расстрэлы, пра лёсы выбітных і самых звычайных бабруйчан – ахвяраў рэпрэсіяў.
«У Бабруйску цяпер ніхто гэтым не займаецца. А я хачу, каб людзі маглі атрымаць інфармацыю, даведацца, каб прыходзілі, бачылі гэтыя экспанаты, фотаздымкі, і казалі: які жах, якое вар’яцтва! Гэтага не мусіць быць ніколі ў жыцці, і ніколі не мусіць паўтарыцца!»
Актывістка мяркуе, што аднаўленне Музею палітычных рэпрэсіяў сёння – не выпадковая і даўно наспелая справа: «Ужо колькі гадоў як палітычны пераслед зноў стаў нашаю рэчаіснасцю. А тое, што робіцца сёння ва Украіне… І правакуецца гэта ўсё зноў Расеяй, як і сталінскія рэпрэсіі ў свае часы. Гэты музей – папярэджанне нам, каб тое, што было, не паўтарылася».
Госць прэзентацыі Уладзімір Раманоўскі, прадстаўнік міжнароднай арганізацыі «Мемарыял» у Беларусі, падараваў новаму музею кнігі на тэму палітычных рэпрэсіяў.
«Такі музей мае існаваць, бо гэта тое, што складае нашую трагічную памяць. Бо калі гісторыя забываецца, яна паўтараецца, – зазначыў спадар Раманоўскі. – Такі музей мусіць кампенсаваць тыя недахопы адукацыйнай сістэмы, што мы сёння маем, якая, фактычна, ліквідуе сапраўдную гісторыю, бо сёння ў нас, і ў Расеі, на дзяржаўным узроўні наследуецца палітыка Савецкага Саюзу».
Рэдактар газеты «Бабруйскі кур’ер» Анатоль Санаценка прапанаваў пашырыць часавыя межы экспазіцыі да сённяшніх дзён, бо «і сёння ў нас хапае рэпрэсаваных, палітвязняў».
Падтрымала гэтую думку Таісія Кабанчук, каардынатарка БХД па Бабруйску, унучка рэпрэсаваных сталінскай сістэмаю. «Гулаг у Беларусі ёсць і сёння. І сёння сядзяць палітвязні. Давайце створым экспазіцыю і пра іх, пакажам наведнікам, што сёння адбываецца ў нас».
Музей ахвяраў палітычных рэпрэсіяў быў створаны ў Бабруйску ў 1995 годзе. За ўвесь час існавання ён не атрымаў ніякага падтрымання ні ад гарадскіх, ні ад рэспубліканскіх уладаў. У 2001 годзе дырэктарку музея Ганну Бокач адхілілі ад кіравання бабруйскім аддзяленнем Беларускай арганізацыі ахвяраў палітычных рэпрэсіяў. Неўзабаве бабруйскае аддзяленне перастала існаваць, а ў 2007 годзе экспазіцыя музею была вывезеная з Бабруйску. Частка яе, паводле некаторых звестак, можа быць у музеі Анатоля Белага ў Старых Дарогах.
{movie}Вольга Піманава запрашае далучыцца да аднаўлення Музею рэпрэсій|right|16518{/movie}
Вольга Піманава запрашае ўсіх ахвотных далучацца да аднаўлення музея і шукаць страчаныя фонды, а таксама просіць дапамогі ў тых, хто мае нейкія матэрыялы, што датычаць рэпрэсаваных беларусаў, можа падзяліцца сямейным архівам ці ўласнымі ўспамінамі.
Новаствораная экспазіцыя Музею ахвяраў палітычных рэпрэсіяў размясцілася ў бабруйскім офісе Аб’яднанай грамадзянскай партыі, адрас якога: г. Бабруйск, вул. Кастрычніцкая, 173А.
Марына Маўчанава, belsat.eu