У сепаратыстаў праблемы: банды не падпарадкоўваюцца, мясцовыя ваяваць не хочуць
Расейскі дыверсант Ігар Гіркін на мянушку Стралок запісаў зварот да жыхароў Данбасу. Ён заявіў, што цяпер прымае да свайго войска і жанчын, бо расчараваны нізкаю актыўнасцю мужчынскага насельніцтва, а асабліва – афіцэраў: «Ніяк не чакаў, што ўва ўсёй вобласці не знойдзецца і тысячы мужчынаў, гатовых рызыкаваць жыццём не ў сябе ў горадзе, а на перадавой, дзе кожны дзень страляюць».
Паводле яго, большасць «апалчэнцаў» – мужчыны ва ўзросце за 40, а маладыя «навабранцы» прыязджаюць толькі дзеля таго, каб атрымаць зброю, а потым уцякаюць. «Ужо больш за месяц як мы, маленькая група добраахвотнікаў з Расеі ды Украіны, пачуўшы заклікі аб дапамозе, прыбылі сюды і са зброяй у руках супрацьстаім усяму украінскаму войску», – заявіў Гіркін.
{movie}Зварот Гіркіна|right|16498{/movie}
З заяваю для прэсы выступіў намеснік Гіркіна, баявік на мянушку Абвэр. Ён прызнаў, што на тэрыторыі Данбасу, апроч украінскага войска і сілаў сепаратыстаў, дзеяць іншыя ўзброеныя групы, якія нікому не падпарадкоўваюцца. Ён таксама папярэдзіў, што, паводле ягонай інфармацыі, украінскія сілавікі плануюць «зачыстку» Данецку. «Бачыць Бог, я не хацеў гэтае вайны ды не я яе пачынаў. І мне вельмі шкада, што ёсць ахвяры», – дадаў ён.
Паводле звестак групы «Інфармацыйны супраціў» падчас антытэрарыстычнай аперацыі на Данбасе загінулі 24 украінскія сілавікі, параненых – з 70. Што да ахвяраў у сепаратыстаў, лік можа ісці на сотні. Прадстаўнік «Інфармацыйнага супраціву» Дмытро Тымчук паведаміў, што баевікі плануюць вывезці целы забітых у Расею, «каб пазбегнуць ідэнтыфікацыі грамадзянаў Расеі і вайскоўцаў узброеных сілаў Расейскай Федэрацыі». «Трупаў налічваецца некалькі сотняў», – паведамляе Тымчук.
МЛ, belsat.eu
