Цэнзура, папярэджанні, арышты. Такія перашкоды зазнаюць беларускія незалежныя журналісты падчас выканання сваіх прафесійных абавязкаў. Тым больш каштоўныя матэрыялы, якія сведчаць пра высокія стандарты прафесіі. Найлепшых Беларуская асацыяцыя журналістаў узнагародзіла прэміяй “Вольнае слова”.
{movie}Вольнае слова|right|16249{/movie}
Ад узнікнення БНР і лёсаў дысідэнтаў ды апазіцыянераў – да аповеду пра чалавека, памілаванага ад смяротнага выраку, ці таго, хто наважыўся змяніць пол… Практычна ўсе тэмы, якіх не закранаюць дзяржаўныя медыі, знайшлі сваё адлюстраванне ў матэрыялах конкурсу “Вольнае слова”.
ЮРАСЬ КАРМАНАЎ, БЕЛАРУСКАЯ АСАЦЫЯЦЫЯ ЖУРНАЛІСТАЎ:
“«Вольны вецер напеў вольных песень табе». Гэтыя словы Янкі Купалы сталі дэвізам нашага конкурсу. І больш за паўсотню журналістаў адгукнуліся і даслалі свае тэксты”.
Тэксты ж, апублікаваныя ў “Нашай Ніве”, практычна здамінавалі пераможныя месцы. Ягор Марціновіч стаў першым у намінацыі “Найлепшы інфармацыйны матэрыял” з расследаваннем пра катэджы чыноўнікаў у Драздах і другім у мастацка-публіцыстычным жанры. З найлепшым аналітычным матэрыялам пра нявыгадных уладам беларускіх намінантаў на Нобэлеўскую прэмію перамог Андрэй Дынько.
АНДРЭЙ ДЫНЬКО, ГАЛОЎНЫ РЭДАКТАР «НАШАЙ НІВЫ»:
“Конкурс “Вольнае слова” дазваляе нам самім паглядзець на тое, што мы робім, з такой вышыні пражытага года. І пабачыць вось так вось гэтыя рэчы, яны трэба былі людзям. Яны запомніліся”.
Сусветны дзень свабоды прэсы – нагода ўзгадаць і пра яе адсутнасць. У сёлетнім рэйтынгу свабоды медыяў праваабарончая арганізацыя “Freedom House” змясціла Беларусь у суседстве з Паўночнаю Карэяй, Узбекістанам і Сірыяй.
Але незалежныя беларускія журналісты ацанілі і калегаў з дзяржаўных выданняў, якія з вольным словам наўрад ці асацыююцца. І якія не зазнаюць такога пераследу, як тыя, хто нават коштам уласнае свабоды адстойвае права на свабоду слова.
ЮРАСЬ КАРМАНАЎ, БЕЛАРУСКАЯ АСАЦЫЯЦЫЯ ЖУРНАЛІСТАЎ:
“Беларускія журналісты разумеюць, што, прытрымліваючыся прафесійных стандартаў, можна пазбегнуць розных непрыемных сітуацыяў падчас працы ў Беларусі, а таксама за яе межамі. Стандарты з’яўляюцца для журналістаў пэўным парасонам, які бароніць іх ад нападкаў з аднаго ці іншага боку”.
А вольнае слова ды незалежная інфармацыя – гэта і даспехі, і зброя. У барацьбе за свабоднае грамадства.
Ганна Любакова, “Аб’ектыў”