Украіскае войска актывізуецца - адбілі штурмы баевікоў у Краматорску і Славянску (відэа)
Украінскія вайскоўцы адбілі атакі экстрэмістаў на лётнішчы ў Краматорску і Славянску.
Прарасейскія сепаратысты штурмавалі вайсковы аэрадром у Краматорску.
Як перадаваў карэспандэнт «Еспресо.TV», нейкі час таму ўкраінскі самалёт хацеў здзейсніць пасадку на лётнішчы, але яго абстралялі. У выніку самалёт паляцеў у бок Данецку.
{movie}Знішчальнік вядзе абстрэл лётнішча ў Краматорску|right|15908{/movie}
Пасля да лётнішча накіраваліся аўтамабілі хуткай дапамогі. Намеснік рэдактара газеты «Новости Краматорска» Андрэй Раманенка паведаміў у «Facebook’у»: «У Краматорску на аэрадроме вайна ідзе… нехта спрабуе ўзяць штурмам частку!»
З вайсковага гарнізону, які размяшчаецца побач з лётнішчам, паведамляюць, што быў штурм адміністрацыйнага будынку аэрадрому. Над месцам здарэння кружлялі самалёты, але чые яны – невядома. Штурм баевікоў удалося спыніць, падае news.liga.net.
{movie}Самалёт над вайсковым лётнішчам у Краматорску|right|15909{/movie}
Сепаратыстаў выгналі таксама з будынку Краматорскага гарадскога аддзелу міліцыі, але захопнікі разбілі там камп’ютарную тэхніку, пабілі шыбы.
Экстрэмісты паспрабавалі захапіць таксама лётнішча блізу Славянску, паведаміў дырэктар Цэнтру вайскова-палітычных даследаванняў Дмытро Тымчук.
Паводле эксперта, ахова лётнішча аказала ўзброены супраціў. На яе запыт у раён лётнішча прыбыло два баявых самалёты, якія стралялі не на паразу. Экстрэмісты адышлі.
У горад Славянск ўвайшла калона ўкраінскіх войскаў. Пра гэта паведаміла на сваёй старонцы ў «Twitter’ы» журналістка Ганна Лазарава: «У Славянск толькі што ўвайшла калона ўкраінскіх сілавікоў: каля 500 вайскоўцаў, 20 БТР-аў, 2 верталёты, некалькі аўтобусаў».
Дзеянні ўкраінскіх вайскоўцаў у Краматорску і Славянску, – чарговая фаза антытэрарыстычнай аперацыі, распачатай украінскім войскам, падае «Еспресо.TV». Сярод сепаратыстаў могуць быць параненыя і забітыя.
МЯ, belsat.eu, паводле espreso.tv, ostro.org, pravda.com.ua, liga.net
