ЗБІГНЕЎ БЖЭЗІНЬСКІ, БЫЛЫ ДАРАДЦА ПРЭЗІДЭНТА ЗША:
“Калі ўкраінцы будуць супраціўляцца, яны будуць прайграваць крок за крокам, але калі супраціў працягнецца, то Захад – падабаецца яму ці не – пад вялізным грамадскім ціскам будзе вымушаны дапамагчы ўкраінцам. Не наўпрост войскамі, але зброяй”.
Прагноз несуцешны – Захад паказаў, што не гатовы да сур’ёзнай канфрантацыі з Расеяй, ні палітычна, ні эканамічна.
ПАВЕЛ УСАЎ, ПАЛІТОЛАГ:
“Украіна мусіць спадзявацца выключна на свае ўнутраныя сілы, на сваю ўнутраную волю. Але, як мы бачым, украінскія палітычныя эліты нават да канца не разумеюць, што яны мусяць рабіць у гэты крытычны момант”.
Украінскія ўлады, а потым і сілавікі маглі б абараніць усход мірным шляхам, калі б своечасова ўзмацнілі ахову галоўных мясцовых аб’ектаў. Але час быў бяздарна страчаны, кажа сусветна вядомы эканаміст Андрэй Іларыёнаў. Дарэчы, калісьці ён кансультаваў непасрэдна Пуціна, але звольніўся, як пабачыў, у якім кірунку Пуцін вядзе Расею.
АНДРЭЙ ІЛАРЫЁНАЎ, БЫЛЫ ДАРАДЦА ПРЭЗІДЭНТА РАСЕІ:
“На жаль, цяпер мірнымі спосабамі вырашыць праблему ўсходу Украіны ўжо немагчыма… Калі на працягу трох дзён інтэрвенцыя не будзе спыненая, шэраг абласцей Украіны будзе страчаны. Сумняваюся, што ў такіх умовах урад у Кіеве выстаіць. Тады лёс усёй Украіны будзе зусім іншы”.
Іншым будзе лёс усіх постсавецкіх краінаў. Пуцін афіцыйна абвесціў курс на “збіранне зямель расейскіх” – то бок, былых краінаў Савецкага Саюзу, і актыўна падпарадкоўвае сабе мясцовыя ўлады гэтых дзяржаваў. Падазроныя дзеянні расейскіх спецслужбаў заўважылі і ў еўрапейскай Латвіі – там Масква ўзмацніла прапаганду сярод расейскамоўных грамадзянаў, ёсць элементы вярбоўкі.
Усё больш заўважна расейскія спецслужбы дзеюць у Малдове. Апошнімі днямі ў Кішынэў вялікімі групамі прылятаюць маладыя мужчыны спартовай знешнасці, і потым накіроўваюцца ў непрызнаную Прыднястроўскую Рэспубліку, дзе Расея мае вайсковыя базы. Небяспеку для незалежнасці разумее нават Аляксандр Лукашэнка. Адсюль і рыторыка падрыхтоўкі боегатоўнасці – на ўсялякі выпадак. Адсюль і шматвектарнасць у дачыненнях з Украінай і Расеяй.
АЛЯКСАНДР ЛУКАШЭНКА, КІРАЎНІК БЕЛАРУСІ:
“Пхаць Украіну на федэралізацыю цяпер – вельмі небяспечна. Небяспечна ўсім – і Беларусі з Расеяй, і Захаду”.
Аднак магчымасці манеўру ў Лукашэнкі моцна абмежаваныя, кажа Павел Усаў.
ПАВЕЛ УСАЎ, ПАЛІТОЛАГ:
“Паўплываць на змену геапалітычнай сітуацыі Беларусі Лукашэнка ўжо не ў стане. Ён зрабіў усё магчымае, каб Беларусь фактычна цалкам палітычна, эканамічна і стратэгічна залежала ад Расеі”.
Крыўдна, але час, які Беларусь прабавіла ў саюзе з Расеяй, аказаўся страчаным.
Марцін Ярскі, “Аб’ектыў”