Расея рэалізоўвае план уварвання ва Украіну, заяўляе украінскі прэм’ер.
«Я хацеў бы звярнуцца найперш да ўсіх жыхароў усходніх вобласцяў Украіны. Усім цалкам зразумела, што ідзе рэалізацыя антыўкраінскага, антыданецкага, антылуганскага і антыхаркаўскага плану. Плану дэстабілізацыі сітуацыі, плану спробы іншаземнымі войскамі мінуць мяжу і захапіць тэрыторыю краіны, чаго мы не дапусцім», – заявіў украінскі прэм’ер Аресній Яцэнюк сёння, 7 красавіка.
Палітык выказаў спадзяванні, што жыхары гэтых рэгіёнаў хочуць жыць у адзінай Украіне. Учора, 6 красавіка, у Данецку, Харкаве і Луганску сепаратысты захапілі будынкі адміністрацыі ды сілавых структураў. Сепаратысты патрабуюць незалежнасці і выхаду са складу Украіны.
Нагадаем, што раней падчас тэлефоннай размовы канцлера Нямеччыны Ангелы Мэркель з Уладзімірам Пуціным кіраўнік Расеі заявіў, што расейскія войскі ўжо пакідаюць зону непасрэднай блізасці з украінскаю мяжою. Аднак прадстаўнікі ні НАТО, ні Міністэрства абароны Украіны пакуль не заўважылі перадыслакацыяў.
На думку былога прэзідэнта Грузіі Міхэіла Саакашвілі, захоп будынкаў і хлусня Пуціна сведчаць пра рэалізацыю плану Масквы напасці на Украіну.
ЮВ паводле pravda.com.ua