У адказ на правядзенне рэферэндуму ў Крыме аб статусе рэспублікі міністры замежных справаў краін Еўразвязу дамовіліся аб санкцыях у дачыненні двух дзясяткаў чыноўнікаў.
Пра гэта ў сваім мікраблогу «Twitter» паведаміў кіраўнік МЗС Літвы Лінас Лінкявічус.
Паводле інфармацыі «The Wall Street Journal», сярод іх 13 асобаў – расейскія службоўцы, у тым ліку і Міністэрства абароны, – і 8 уваходзяць у склад кіраўніцтва Крыму.
Санкцыі ўключаюць у сябе забароны на ўезд і замарожванне актываў у банках краінаў-сябраў ЕЗ. Лінкявічус падкрэсліў, што праз некалькі дзён удакладняцца дадатковыя санкцыі супраць Расеі.
Супраць жорсткіх санкцыяў у дачыненні Масквы ўжо заявілі Балгарыя, Іспанія, Грэцыя, Партугалія і Кіпр.
Як перадае сайт тэлеканалу «Дождь», прэзідэнт ЗША Барак Оўбама таксама ўвёў санкцыі супраць сямёх расейскіх і траіх украінскіх чыноўнікаў. Указ аб заблакаванні ўласнасці ды забароне на ўезд, між іншага, датычыць экс-прэзідэнта Украіны Віктара Януковіча, Валянціны Матвіенкі, Уладзіслава Суркова, Сяргея Глазьева, Дзмітрыя Рагозіна.
ДР, belsat.eu