Гэткую заяву кіраўнік Беларусі зрабіў на пасяджэнні Савету бяспекі.
«Я буду абараняць інтарэсы сваёй краіны ды дзеяць у строгай адпаведнасці з нашымі дамовамі, у тым ліку ў адпаведнасці з Дамоваю аб будаўніцтве Саюзнай дзяржавы, дзе ў нас ёсць прамыя абавязкі, гэтак жа, як і ў Расеі. Мы ў гэтых адносінах будзем дзеяць», – заявіў Лукашэнка. «Больш за тое, – дадаў ён, – мы апошнім часам, і мы гэтага не хавалі, перабываем у пастаянным кантакце з прэзідэнтам Расейскай Федэрацыі. Мы абмяркоўваем розныя пытанні нашых узаемаадносінаў. Мы не можам абыходзіць бокам і гэтага пытання – яно пастаянна ў полі зроку і прэзідэнта Расеі, і прэзідэнта Беларусі».
Варта зазначыць, што напярэдадні, 11 сакавіка, адбылася тэлефонная размова Уладзіміра Пуціна і Аляксандра Лукашэнкі. Як паведаміла прэс-служба, кіраўнікі дзяржаваў «выказалі агульнае разуменне неабходнасці развіцця сітуацыі ў інтарэсах украінскага народу і ўсіх людзей, якія жывуць ва Украіне».
МЛ, паводле БелТА
