Расея перакінула на ўкраінскі паўвостраў больш за 15 000 вайскоўцаў і не менш за паўсотні адзінак бронетэхнікі. Берагі Украіны ў Чорным моры блакуюць не менш як 10 ваенных караблёў. Расея сцягвае ўзброеныя сілы і да сухапутных межаў з Украінаю.
Расейцы, што называюць сябе стыхійна арганізаванаю самаабаронаю Крыму, захапілі або блакуюць большасць стратэгічных аб’ектаў на паўвостраве. Украінскія вайскоўцы пакуль трываюць пры тактыцы не паддавацца на правакацыі ды супрацьстаяць у выпадку нападаў.
{movie} Два крокі да вайны|right|15131{/movie}
СЯРГЕЙ ШАМШУРА, КЕРЧАНСКІ АТРАД МАРСКОЙ АХОВЫ:
“На гэты момант мы падпарадкоўваемся дзяржаўнай памежнай службе Украіны…”
А невядомыя ў камуфляжы гатовыя страляць у журналістаў, абы не трапіць у кадр. Абараняць вайскоўцаў ад вайны спрабуюць іхныя сваякі. Жанчыны ідуць да вайсковых базаў, спадзяюцца, што ў іх страляць не будуць.
СВЯТЛАНА, ЖОНКА ЎКРАІНСКАГА ВАЙСКОЎЦА:
“Неасцярожны стрэл якога псіха прывядзе да таго, што пачнецца страшнае…”
Гэта вайсковая база ў сяле Перавальнае. Сотні расейскіх спецназаўцаў заблакавалі вайсковую частку. Мясцовыя жыхары ўжываюць супраць іх святую ваду.
ВАЛЕРЫЙ БОЙКА, НАМЕСНІК КІРАЎНІКА БРЫГАДЫ:
“Я далёкі ад думкі, што будзе штурм і будзе вайна”.
Аднак не паўсюль супрацьстаянне ідзе мірным шляхам. Падчас штурму Севастопальскай брыгады тактычнай авіяцыі пацярпеў украінскі афіцэр, яго кантузіла расейскімі шумавымі гранатамі. А ў Балаклаве спецназаўцы жорстка збілі вайскоўцаў за тое, што ўкраінцы адмовіліся перайсці на бок так званага крымскага войска. Адмовіліся здрадзіць і марскія афіцэры ў штабе вайскова-марскіх сілаў, вербаваць якіх прыехаў “камандуючы ВМС Рэспублікі Крым” Дзяніс Беразоўскі. Прыехаў марна.
СЯРГЕЙ ГАЙДУК, КІРАЎНІК ВМС УКРАІНЫ:
“Мы застаемся верныя прысязе народу Украіны і выконваем свой канстытуцыйны абавязак”.
Расейскі спецназ спрабаваў захапіць нават крымскае Упраўленне дзяржаўнай пенітэнцыярнай службы Украіны, што адказвае за турмы ды ізалятары. Аднак прысягнуць на вернасць прэм’ер-міністру Сяргею Аксёнаву, чалавеку з крымінальным мінулым, афіцэры адмовіліся. Сёння ўначы расейскія знішчальнікі Су-27 парушылі паветраную мяжу Украіны над Чорным морам. Гэта класічны прыклад вайсковай правакацыі. Але украінскае Міністэрства ўнутраных справаў чакае правакацыяў на зямлі.
МІКОЛА ВЕЛІЧКОВІЧ, НАМЕСНІК МІНІСТРА ЎНУТРАНЫХ СПРАВАЎ:
“Невядомыя плануюць пад выглядам украінцаў забіць трох-чатырох расейскіх жаўнераў, каб легітымізаваць увядзенне расейскіх войскаў на тэрыторыю Украіны”.
Расея будзе абараняць сваіх грамадзянаў у Крыме так, як захоча, – з такім настроем адбылася сёння размова між расейскім прэм’ер-міністрам Дзмітрыем Мядзведзевым і ягоным украінскім калегам Арсеніем Яцэнюком. Мядзведзеў заявіў Яцэнюку, што ў выпадку супраціву ўкраінскія чыноўнікі будуць несці адказнасць.
Таксама сёння Дзмітрый Мядзведзеў падпісаў загад аб стварэнні кампаніі, што будзе будаваць мост праз Керчанскую пратоку, – якраз калі стала вядома аб захопе керчанскай паромнай пераправы расейскімі вайскоўцамі без апазнавальных знакаў і пра вялікую колькасць бронетэхнікі з расейскага боку пратокі. Мост грунтоўна звяжа Крым з Расеяй і, паводле Мядзведзева, паслужыць развіццю гандлю ды інвестыцыяў. Аднак у Кіеве непакояцца, што падчас зацяжнога супрацьстаянне ў Крыме мост будуць ужываць для манеўраў расейскія войскі. У Крым праз яго можна будзе перакінуць, напрыклад, танкі з Каўказу. Там, між іншага, базуюцца тыя чачэнскія войскі, што ўжо ваявалі ў Грузіі, калі Расея заняла Абхазію і Паўднёвую Асецію.
РАМЗАН КАДЫРАЎ, ПРЭЗІДЭНТ ЧАЧЭНІІ:
“Я гатовы выехаць ва Украіну, у нас ёсць добраахвотнікі, не адзін, не тысяча, а дзясяткі тысячаў, якія з задавальненнем абароняць украінскі народ, расейскі народ, казакоў, татараў”.
Добраахвотнікаў дапамагаць Расеі ва Украіне і так нямала – напрыклад, у Харкаве.
ЖЫХАР ХАРКАВА:
“Я прысягу даваў на вернасць Савецкаму Саюзу. Для вас яго няма, а для мяне няма ўкраінскай дзяржавы”.
У Харкаве памерлі два актывісты Еўрамайдану, якіх жорстка збілі прарасейскія актывісты, што захоплівалі абласную адміністрацыю ў суботу. Тое самае адбывалася сёння ў Данецку. А ў горадзе Мікалаеў прыхільнікі Савецкага Саюзу заблакавалі дарогі, каб не прапусціць вайсковую тэхніку, што едзе на Крым, і актывістаў Еўрамайдану.
УДЗЕЛЬНІК БЛАКАВАННЯ:
“Мы стаім тут, каб не дапусціць сюды з Кіева, з Заходняй Украіны ўсіх гэтых фашыстаў, што хочуць тут перакуліць горад дагары нагамі”.
Але дзе ж тыя фашысты-западэнцы? У Львове ўлады і жыхары гораду прынялі каля 20 сем’яў уцекачоў з Крыму, а на тыдні тут чакаюць каля сотні крымскіх татараў. Разгулу ксенафобіі, пра які кажуць крамлёўскія тэлеканалы, няма і ў сталіцы.
СВЯТЛАНА І УЛАДЗІМІР, ЖЫХАРЫ КІЕВА:
“Мы супраць канфлікту. Мы за тое, каб былі мір і сяброўства. Мы не хочам вайны”.
“Каб не забівалі адзін аднаго, каб людзі жылі спакойна, паўсюдна, на ўсіх кантынентах”.
Вайны тут не хочуць, але здавацца ў палон не хочуць яшчэ больш.
ЛЮДМІЛА, ЖЫХАРКА КІЕВА:
“Цяпер у ваенкаматы нашыя дзеці ідуць, а як трэба, то мы пойдзем у народнае апалчэнне”.
Украінцы не хочуць, і каб да ўлады вярнуўся стаўленік Масквы Віктар Януковіч. Дарэчы, ягоныя звесткі з’явіліся сёння на сайце Міністэрства ўнутраных справаў Украіны у рубрыцы “Вышук”.
Марцін Ярскі, “Аб’ектыў”, belsat.eu