Майдан у аблозе (відэатрансляцыя + онлайн)

Хуткага штурму не атрымалася. Колькасць загінулых можа перавышаць 20 асобаў. На пад’ездах да Кіева – блок-пасты.

11:30 Міністр абароны Украіны Павел Лебедзеў пацвердзіў інфармацыю аб накіраванні ў Кіеў 500 дэсантнікаў. Паводле вайскоўца, гэта зроблена дзеля ўзмацнення аховы вайсковых базаў і арсеналу. Раней Міністэрства абароны падкрэслівала, што вайскоўцы не будуць умешвацца ва ўнутраны канфлікт.

08:48 Сілавікі бяруць Майдан у кола. У некаторых месцах у ачапленні байцы “Беркута” замяняюць жаўнераў унутраных войскаў.

Працаўнікі ДАІ з аўтаматамі блакуюць частку ўзедаў у Кіеў, а таксама спыняюць машыны ва ўкраінскай сталіцы.

07:50 На Майдан прыехалі падмацаванні са Львову. Да Кіева сцягваюцца аўтобусы і аўты з прыхільнікамі Майдану.

Live streaming video by Ustream

Маніфестанты працягваюць бараніць межы Майдану – гэта палаючыя барыкады, якія сілавікі намагаюцца патушыць з вадамётаў.

06:10 Януковіч зрабіў нарэшце афіцыйную заяву, дзе абвінавачвае апазіцыянераў і актывістаў у эскалацыі канфлікта. “Так, мы ўжо не вернем загінуўшых. Так, мы ўжо заплацілі занадта дарагую цану за амбіцыі тых, хто рвецца да ўлады. Але каб кошт не быў яшчэ вышэй, заклікаю – апамятайцеся! Трэба садзіцца за стол перамоваў і ратаваць Украіну”, – заклікае прэзідэнт. Паводле кіраўніка краіны, апазіцыя павінна адхрысціцеся ад “радыкалаў”.

05:45 На фб-суполцы Еўрамайдану паведамляюць, што ад вогнепальнага ранення ў жывот памёр журналіст газеты “Вести” Вячаслаў Верамей. Паводле журналіста Анатоля Велімоўскага, у Вячаслава праўдападобна стралялі цітушкі на вуліцы Уладзімірскай.

05:25 Сілавікі актыўна намагаюцца патушыць палаючыя барыкады.

05:00 На сцэне палонны салдат з унатраных войскаў. Прапануюць яму нешта сказаць, кажа, што бараніў гонар салдата. Больш не знайшоўся што адказаць. Хлопцы з пратэстоўцаў рэагавалі нярвова. Увесь вольны ад прамоваў час сцэна занятая святарамі, гучаць малітвы.

З’явілася інфармацыя, што на 5 паверсе будынка прафсаюзаў застаецца дзяўчына, яе спрабуюць выратаваць. Гараць 1 і 2 паверхі.

На месцы знаходжання цітушак, на скрыжаванні Вялікай Жытомірскай і Уладзімірскай вуліц, актывісты знайшлі вялікую колькасць гільзаў ад АК, гумастрэлаў і баявых 9-га калібра. Вакол шмат нечых асабістых рэчаў, адзення, лужыны крыві, а таксама візітоўка карэспандэнта газеты “Вести”. Пра гэта паведамляе фб-суполка Самооборона Майдану.

04:45 Сілавікі спрабуюць затушыць барыкады і знайсці падыход, іх сустракаюць градам камянёў.

04:10 Будынак прафсаюзаў працягвае гарэць, пажарныя не могуць дабрацца да вады. Пратэстоўцы бароняцца вогненнай і дымавой завесай ад сілавікоў, тыя з дапамогай моцнага пражэктара спрабуюць разглядзець Майдан.

03:50 Суполка Еўрамайдан-СОС: “Людзей масава затрымліваюць і вязуць у невядомым накірунку. У пастарункі не пускаюць адвакатаў. Любая дапамога не будзе лішняй”. Тым часам пажарныя здолелі ўратаваць людзей з ахопленага полымем будынку прафсаюзаў.

03:35 Перамовы апазіцыянераў з Януковічам нічога не далі. Януковіч параіў пратэстоўцам ісці да дому. Прэс-сакратарка Клічко з яго словаў паведаміла, што прэзідэнт Украіны неадэкватна ацэньвае сітуацыю.

03:10 Да будынку прафсаюзаў пад’ехалі пажарныя. Тым часам агонь на барыкадах згасае, матэрыялаў для распалкі не хапае. Трывае зацішша.

02:11 Палае будынак прафсаюзаў, у ім заблакаваныя людзі. Беркутаўцы раскідалі ўнутры кактэйлі Молатава. Людзі рознымі спосабамі спрабуюць выбрацца з палону.

02:06 Як паведаміў “Украінскай праўдзе” кіраўнік медыцынскай службы Майдана Алег Мусый, з боку мітынгоўцаў – 20 памерлых і каля 500 параненых.

01:42 Нядаўнюю атаку ўдалося спыніць. Журналіст Сяргей Лешчанка піша ў “Faceebook”: ягоных знаёмых абзвоньвае кіраўніцтва дзяржбанку, іх літаральна толькі што папярэдзілі ў Кабінеце міністраў, каб на працу заўтра ніхто не выходзіў, таму што плануецца, даслоўна, “жорсткая зачыстка”… Арыентыровачна – зраніцы, калі шмат хто разыйдзецца паспаць.