Нагоду для вялікіх сольных канцэртаў Віктар Шалкевіч падбірае заўжды вельмі старанна. Мусіць таму яны здараюцца толькі раз–два на год.
Нагодаю для суботняй імпрэзы стала 55-годдзе гарадзенскага барда, якое ён справіў за колькі дзён да гэтага.
{movie} Агляд падзеяў культуры|right|14852{/movie}
«Гэта для мяне такі дастаткова складаны дзень. Мне заўсёды дзяцінства ўспамінаецца. Але пры ўсім пры гэтым прыехалі сябры, мы пайшлі ў рэстаран. І я «нажэрся». Ад нерваў, перажываў , што мне 55. А потым падумаў: а што тут страшнага, буду жыць далей», – прызнаецца сам Віктар Шалкевіч.
Падчас выступу на ўласным юбілеі Шалкевіч жартаваў яшчэ болей чым заўжды. Ды спяваў свой «Сумны беларускі блюз». Апроч вядомых песень, у гэты вечар было багата і прэм’ераў.
«Першая песня называлася «Блюз замкнёнага кола», гэта пра станцыю Буслы – дзе прачнуўся, туды і прыехаў. Потым ёсць такая песня «Блюз з раніцы ў чацвер», як наркакур’ер спазняецца, потым песня пра гуркі і памідоры, яна такая сюррэалістычная. Потым ёсць яшчэ песня пра Украіну, якую мы ўсе любім…», – распавёў аўтар.
Шалкевіча-актора на вялікай сцэне можна пабачыць часцей як Шалкевіча-барда. У сакавіку ён грае ў пастаноўцы Купалаўскага «Местачковае кабарэ».
Іншыя тэмы: Гурт «J:Морс» сабраў поўны аншлаг у дзень святога Валянціна і паабяцаў новы альбом да канца года. Музыкі з «Разбітага сэрца пацана» прэзентавалі новы кліп у клубе «Цэнтр». У пабе «Лісіная нара» зладзілі ірландскі дзень закаханых – з просценькімі кельцкімі танцамі ды музыкаю ад гурта «Эйрут». У Гомлі на плоце каля галоўнага ўваходу ў палацава-паркавы ансамбль адкрылася выстава вясельных фатографаў Іллі Лемешава і Вікторыі Пятрэнкі. Абвесцілі намінантаў на літаратурную прэмію «Дэбют» імя Максіма Багдановіча.
Сяргей Будкін, Адэля Дубавец, «Навіны культуры», belsat.eu