Жыхары Менску прыносяць кветкі ды лампады да помніка Тарасу Шаўчэнку побач з будынкам пасольства Украіны. Ля помніка прымацавалі картку «За нашу і вашу свабоду».
Кветкі прынеслі і жыхары Берасця да помніка Кабзару на бульвары Шаўчэнкі. Тут жа прымацавалі транспаранты «Майдан, мы з вамі!», «Слава Украіне. Героям слава!». На гаўбцы аднаго з жылых будынкаў Берасця можна пабачыць невялікі сцяг Украіны.
Гарадзенка Вольга Крапоціна прапанавала праз «Фэйсбук» выказаць спачуванне і салідарнасць з братэрскім народам каля Ганаровага консульства Украіны. Сама яна прыйшла разам з сяброўкаю, каб памаліцца аб супакоі душы забітых.
«Пабачыла, што Менск гартуецца на знак салідарнасці, і вырашыла запрасіць гарадзенцаў. Такія жахі не кожны дзень здараюцца. Мне сёння цэлы дзень душу вярэдзіць. Працаваць не магла», – прызналася дзяўчына.
Маладзён Станіслаў Рачкель прыйшоў, бо адчувае сваю блізкасць з украінскім народам. Хлопец падкрэсліў, што ад выніку сёлетніх пратэстаў у Кіеве, магчыма, будзе праз нейкі час залежаць лёс беларусаў: «Я прыйшоў запаліць зніч, бо, па-першае, на Майдане загінуў адзін з маіх суайчыннікаў. І гэта вялікі знак, калі чалавек памірае за ідэалы некага. Па-другое, я лічу ўкраінцаў братэрскім народам праз тое, што мы ў падобных абставінах».
Настасся Фрода, МЯ, belsat.eu
