Каб наведаць Марс ці Венеру або пабываць у Парыжы ці Дубліне, не трэба пакідаць межаў Беларусі. Беларусы дзеляцца ў інтэрнэце, назвы якіх нашых вёсак іх найбольш здзівілі.
У суполцы «Мая краіна – Беларусь» сацыяльнай сеткі «УКантакце» абмяркоўваюць самыя незвычайныя і запамінальныя назвы беларускіх мясцовасцяў.
Вампершчына ў Шчучынскім раёне
«Важу з сабой асінавы кол», – жартуюць інтэрнаўты. Праўда, вёска мае сваю назву не ад крывасмокаў, а ад прозвішча былога ўладальніка – пана Вемперскага.
Фота: vk.com/majakrainabelarus
Венера ў Лагойскім раёне
Чаму гэтак называецца вёска, ёсць некалькі версіяў. Самі жыхары даводзяць, што паселішча гэтак назвалі ў часе адкрыцця планеты Венера. Гэтае касмічнае цела, аднак, ведалі яшчэ антычныя цывілізацыі. Ці сапраўды вёска аж настолькі старажытная?
Фота: zviazda.by
Марс у Дзяржынскім раёне
Цяпер тут жывуць усяго некалькі чалавек. Новую вёску ў 20-я гады мінулага стагодззя гэтак назваў адзін калгаснік, які хацеў пахваліцца сваёй адукаванасцю сярод сялянаў.
Фота: fotobel.by
Юпіцер у Дзяржынскім раёне
Зусім непадалёк ад Марсу – вёска Юпіцер, якая таксама паступова вымірае. З такою ж назваю ёсць паселішча і ў Лоеўскім раёне, у якім жыхароў таксама вельмі мала.
Фота: vk.com/majakrainabelarus
Яя ў Браслаўскім раёне
Гэтая вёска ў спісе беларускіх паселішчаў – на самым апошнім месцы. Паводле легенды, яе заснавалі шведы. Жыхароў называюць «яйскія». «Вёска самалюбаў і эгаістаў», – ахрысцілі яе інтэрнаўты.
Фота: chopperforum.ru
Гадзілавічы ў Рагачоўскім раёне
Вельмі старажытнае паселішча, ля якога месціцца курганны могільнік радзімічаў (X–XII стст.). «Ці назва пайшла ад Гадзілы?» – жартуюць інтэрнаўты.
Фота: belniva.by
Бухалаўка ў Гомельскім раёне
Фота: chopperforum.ru
Праўда ў Чэрвеньскім раёне
Самыя праўдзівыя людзі – з вёскі Праўда.
Фота: chopperforum.ru
Дублін у Брагінскім раёне
Беларускі Дублін – даволі вялікае мястэчка, якое, праўда, пацярпела пасля аварыі на Чарнобыльскай АЭС. Ірландцаў там няма.
Фота: facebook Аляксея Валабуева
Прасці ў Нясвіжскім раёне
Некаторыя кажуць, што вёску Прасці назвалі на трасянцы.
Фота: globus.tut.by
Рай у Сенненскім раёне
Вёска Рай амаль апусцела. Чамусьці людзі не хочуць жыць у Раі.
Фота: globus.tut.by
Парыж у Браслаўскім раёне
У беларускім Парыжы на вазах возяць бульбу.
Фота: stasja.fotoblog.by
Няптун на Магілёўшчыне
Вёска ўзнікла ў балоцістай мясціне. Ці не ад багацця вільгаці яе гэтак назвалі?
Фота: forum.globus.tut.by
Манголія ў Сенненскім раёне
Вёска мае не надта багатую гісторыю – ёй менш за 100 гадоў. Мяркуецца, што паселішча гэтак назвалі на знак сяброўства з Мангольскаю Народнаю Рэспублікаю. У вёсцы засталіся два жылыя дамы.
Фота gazetaby.com
Новыя Чамаданы ў Шклоўскім раёне
На радзіме Лукашэнкі – вёска Новыя Чамаданы.
Фота: saypn.livejournal.com
Каўказ у Кармянскім раёне
Вёска настолькі малая, што не мае нават шыльды з назвай. Аднак яе экзатычныя назва фіксуецца на мапе.
Фота: bel-jurist.com
Сахалін у Слуцкім раёне
Паглядзець на вёску прыязджаюць жыхары расейскага Сахаліну, якія наведваюць Беларусь.
Фота: ng.by
Максім Ярашэвіч, belsat.eu
