Адным з падазраваных ва ўдзеле ў закалотах пад Адміністрацыяй прэзідэнта Украіны 1 снежня аказаўся фатограф-аматар Сяргей Нужненка з Кіраваградскай вобласці, які прыехаў пафатаграфаваць Еўрамайдан ў Кіеве.
Сябры Сяргея шакаваныя яго затрыманнем і заклікаюць грамадскасць дапамагчы, перадае тэлеканал «Tsn.ua».
«Ягоная мара – гэта фота і падарожжа… Сяргей прайшоў і праехаў амаль усю нашую краіну са сваім заплечнікам і камераю… Гэта сумленны і прыстойны чалавек… А цяпер яго мары падарожнічаць заканчваюцца падарожжам за краты?», – напісала на Сяргеевай старонцы ў сацыяльнай сетцы «УКантакце» ягоная знаёмая.
Прысуд аб арышце на два месяцы абматаны бінтамі Сяргей сустрэў саркастычнымі апладысментамі.
У сваю чаргу, пракуратура Кіева распачала дасудовае расследаванне збіцця журналістаў працаўнікамі спецпадраздзялення «Беркут» 1 снежня ля адміністрацыі прэзідэнта.
Фота Уладзь Грыдзін
Ю.В. паводле Tsn.ua