Удзельнікі шэсця нясуць прыблізна 20 сцягоў – бел-чырвона-белыя і з сімволікаю Кансерватыўна-хрысціянскай партыі БНФ (КХП-БНФ), якая ёсць арганізатарам акцыі. Людзі таксама нясуць расцяжкі з надпісамі: «Дзяды», «Кансерватыўна-хрысціянская партыя БНФ», «Беларуская салідарнасць – наш супраціў расейскай акупацыі». Некаторыя ўдзельнікі шэсця спяваюць патрыятычныя песні і перыядычна скандуюць «Жыве Беларусь!».
Калону ўзначальваюць кіраўнікі КХП-БНФ Юрась Беленькі, Сяргей Папкоў, Валерый Буйвал. Старшыня партыі Зянон Пазняк, як вядома, ужо шмат гадоў застаецца ў палітычнай эміграцыі.
Калону суправаджаюць людзі ў цывільным, якія вядуць відэаздымкі акцыі. Каля ДК «Лошыцкі» стаяць два аўтобусы: адзін – з міліцыянтамі ў цывільным, другі – для перавозу затрыманых (аўтазак).
У Лошыцкім яры каля памятнага знаку ў гонар нявінна расстраляных запланавалі мітынг.
МЛ, паводле БелаПАН
