Кракадзілы як сродак рэпрэсіяў і дрэсаванне львоў для падтрымання іміджу – «Белсат» піша пра ролю жывёлінаў у жыцці дыктатараў.
Яна – ільвіца, і імя ёй – Італія
Італьянскі дыктатар Бэніта Мусаліні любіў, каб у наваколлі гулялі львы. Дрэсура разам з коннаю яздою, аўтамабільнымі гонкамі, плаваннем і катаннем на лыжах мела падтрымліваць імідж уладара-мачо.
«У прыгожым заасадзе ў парку ля вілы «Villa Borghese» ў пасляабедзеннай дрымоце бавіць час прыгожая львіца. Яе імя – Італія. І яна належыць Бэніта Мусаліні», – гэтая алегорыя з карэспандэнцыі Эдўіна Л. Джэймза для «The New York Times» 10 красавіка 1928 года. Вядомы таксама здымак дучэ з ільвянём Расам у аўтамабілі.
Гітлер аддана любіў Блондзі
Адольф Гітлер, як вядома, быў аматарам сабакаў. Даводзяць гэта і шматлікія фотаздымкі. Найчасцей яго можна пабачыць з аўчаркаю Блондзі. Асабістая сакратарка фюрэра Траўдль Юнге перад смерцю паспела выдаць мемуары «Да апошняй гадзіны» («Bis Zur Letzten Stunde»), у якіх крывавы дыктатар прэзентаваны як сардэчны і па-бацькоўску клапатлівы чалавек, які аддана любіў свайго сабаку. Улюбёным ягоным заняткам пасля лёгкага сняданку быў шпацыр з Блондзі. Яна, дарэчы, была побач са сваім гаспадаром і ягонаю жонкаю Эвай Браўн да апошніх гадзінаў іхнага жыцця.
Пуцін падарыў Чавэсу сабаку Сталіна
З імем Іосіфа Сталіна звязаныя тры гісторыі. Першая – пра Джульбарса, сабаку, які падчас Другой сусветнай вайны выявіў велізарную колькасць мінаў і снарадаў. Паранены, ён не мог удзельнічаць у Парадзе перамогі на Краснай плошчы, пра што паведамілі маршалу Канстанціну Ракасоўскаму, які перадаў гэта Сталіну. Той загадаў пранесці сабаку па плошчы на сваім кіцелі (узялі стары кіцель без пагонаў).
Расейскі чорны тэр’ер – службовая парода, якую стварылі ў СССР у 1940–1950-я гады, увайшла ў гісторыю пад назваю «сабака Сталіна». Яе атрымалі праз скрыжаванне больш як дзесяці пародаў. Асноўныя патрабаванні, якія ў дзяржаўнай замове атрымаў гадавальнік, былі: марозатрываласць (густая поўсць), фізічная сіла і даўгія канцавіны (каб хутка бегала), шырокія лапы (каб не правальвалася ў снег), магутныя сківіцы і люты характар. Гэта быў ідэальны варыянт для аховы вязняў у лагерах.
За паўгода да смерці прэзідэнта Венесуэлы Уга Чавэса кіраўнік «Раснафты» Ігар Сечын прывёз яму падарунак ад Уладзіміра Пуціна. Гэта быў трохмесячны шчанюк расейскага тэр’ера. Венесуэльскі лідар памёр у адзін дзень са Сталіным, 5 сакавіка.
Карова ў рэзідэнцыі
У рэзідэнцыі кіраўніка Беларусі ёсць не толькі каты і сабакі, але і карова. Летась гэта высветліла радыё «Свабода», якое датэлефанавалася да Паўла Лёгкага, тагачаснага прэс-сакратара Аляксандра Лукашэнкі. Вось што ён распавёў: «…На тэрыторыі рэзідэнцыі каты, наколькі мне вядома, сабакі. Лабрадор ёсць – памежнікі пару гадоў таму падарылі, калі мы наведвалі заставу на Гомельшчыне. Аўчарка ёсць. І карова, і козы, і птушкі розныя: і качкі, і гусі, і куры – шмат розных хатніх жывёлінаў. І ён сам пра гэта не раз публічна распавядаў, пералічваў гэтых жывёлінаў. Чалавек з вёскі, чалавек, які ведае, як трэба клапаціцца пра хатніх жывёлінаў, чалавек, у якога заўсёды былі хатнія жывёліны. І тут ён дзесьці звычкам сваім не здраджвае».
На ўнікальных відэакадрах 1994 года, зробленых у перыяд прэзідэнцкай кампаніі, можна ўбачыць, як жонка будучага прэзідэнта Галіна Лукашэнка поіць сабаку з цэглы.
{movie}Відэа 1994 года: Галіна Лукашэнка поіць сабаку з цэглы|right|13185{/movie}
Кракадзілы як сродак рэпрэсіяў
Перад тым, як стаць крыважэрным дыктатарам Уганды, прафесійны баксёр Ідзі Амін зрабіў кар’еру ў брытанскім войску. Колькасць ахвяраў ягонага кіравання (1971–1979) ацэньваюць на 400 000 чалавек. Перад смерцю шмат хто прайшоў праз катаванні.
Кадыраў: Сёння дзень тыгра, сябры!
Пракрамлёўскі лідар Чэчні Рамзан Кадыраў – вялікі аматар «Інстаграму». Штомесяц ён змяшчае там дзясяткі фотаздымкаў і відэа, на якіх праводзіць нарады, узнагароджвае жанчын і гуляе на вяселлях. Любіць чэчэнскі лідар з’явіцца ў аб’ектыве і ў таварыстве братоў нашых меншых.
«Асалям алейкум, сябры! Сёння адзначаецца Міжнародны дзень тыгра, – паведамляе Кадыраў побач з выяваю, на якой бавіцца з тыгранём. – Адмыслоўцы кажуць, што ва ўсім свеце гэтых прыгожых грацыёзных драпежнікаў засталося менш за 5000. А сто гадоў таму было каля 130 000. У нашай краіне з ініцыятывы Уладзіміра Пуціна прымаюцца рашучыя захады для выратавання пагалоўя тыгра».
Кадыраў дбае не толькі пра дзікую прыроду: пра гэта сведчыць здымак з уласнай падсобнай гаспадаркі (якраз прывезлі некалькі відаў качанятаў). «Займацца садам, агародам і важдацца з хатнімі жывёлінамі ды птушкаю – адзін з маіх любімых заняткаў. І, вядома, калі я заклікаю жыхароў Чэчні весці падсобныя гаспадаркі, прыклад даводзіцца самому падаваць, – шчыруе чэчэнскі лідар. – Ды і свая экалагічна чыстая прадукцыя ў нашыя дні неацэнная».
Львы Хусэйна напалі на амерыканскіх жаўнераў
Дзікія коткі былі аб’ектам захаплення Удэя Хусэйна, сына іракскага дыктатара. Ён трымаў іх у сваім палацы. Пасля прыходу амерыканскіх войскаў у будынку зрабілі вайсковую базу, а звяроў адправілі ў паркі Паўднёвай Афрыкі, бо заапарк у Багдадзе не меў ні месца, ні грошай іх утрымліваць. Дарэчы, калі амерыканскія вайскоўцы ўвайшлі ў горад, іх «віталі» чатыры раз’юшаныя львы: заапарк быў кінуты без нагляду. Жаўнерам давялося падбаць пра харчаванне для звяроў: іх пачалі рэгулярна карміць ежаю, якая паступала з Кувейту ў межах дапамогі.
У палацы Удэя жылі таксама хворы сібірскі тыгр (яго пачалі лячыць амерыканцы) і сляпая бурая мядзведзіца, якую завезлі ў Грэцыю, дзе ёй выдалілі катаракту.
Карміў пудзеляў лепш за ўласны народ
Паўночнакарэйскі правадыр Кім Чэн Ір літаральна за пару месяцаў да смерці набыў сабе кітайскіх дэльфінаў і французскіх пудзеляў. Апошнія заўсёды былі ягоныя ўлюбёнцы. Кэндзі Фудзімато, які сцвярджае, што быў асабістым кухарам дыктатара з 1988 да 2001 года, згадвае, як пудзелі звычайна палежвалі пад абедзенным сталом у чаканні прысмакаў і харчаваліся значна лепш, чым асноўная маса насельніцтва Паўночнай Карэі.
Аліна Кашкевіч, belsat.eu