Гарадзенскія ўлады ўпершыню зладзілі ўрачыстасці, прысвечаныя апекуну Горадні. Дасюль пяць гадоў запар Дні св. Губэрта праводзіла толькі гарадзенская дэмакратычная супольнасць.
Ідэя адзначаць Дні св. Губэрта – апекуна Горадні – узнікла ў асяроддзі, звязаным з кніжнай серыяй «Гарадзенская бібліятэка» шэсць гадоў таму. Штогод арганізатары пры рыхтаванні грамадскіх Дзён св. Губэрта зазнавалі перашкоды: у апошні момант ім адмаўлялі ў памяшканні для правядзення міжнароднай навуковай канферэнцыі, удзельнікам не давалі беларускай візы і г. д. Сёлета ж улады пастанавілі правесці свае святкаванні. Афіцыйныя імпрэзы ўяўлялі сабою стылёвае асарці: ад паказаў сабачай моды, дзе можна было пабачыць хатніх гадаванцаў у строях памежніка ці нявесты, да выступлення рыцарскіх клубаў і частавання шашлыком.
Гарадзенская абласная бібліятэка імя Яўхіма Карскага падрыхтавала літаратурную выставу «Алень святога Губэрта – сімвал душы Горадні». У сваю чаргу некаторыя гандлёвыя пункты заклікалі кліентаў прыдбаць і пакаштаваць свежае мяса аленя.
Шмат хто з удзельнікаў адгукнуўся на прапанову бясплатна пастраляць з лука або пакідаць нажы ў вызначаную мэту. У цэлым жа, шмат хто з гасцей афіцыйнага свята адкрыта нудзіліся.
Сёлета грамадскія святкаванні дня св. Губэрта распачнуцца 5 лістапада. Гарадзенцаў чакае чарговая міжнародная навуковая канферэнцыя «Гарадзенскі соцыум: гісторыя і памяць», шэраг мастацкіх выставаў, прэзентацыяў ды іншых імпрэзаў.
МЯ, belsat.eu