Кіраваць моладзевым грамадскім аб’яднаннем «Малады фронт» будуць чатыры сустаршыні. Траіх з іх выбралі на восьмым з’ездзе арганізацыі, які прайшоў у Менску. Яшчэ аднаго кіраўніка абяруць пазней.
На думку дэлегатаў з’езду, што прайшоў 26 кастрычніка, некалькі сустаршыняў будуць больш спраўна і эфектыўна кіраваць «Маладым фронтам» ва ўмовах беларускай рэчаіснасці.
{movie} Выбары сустаршыняў “Маладога Фронту” |right|13072{/movie}
Аднаго з сустаршыняў, палітвязня Эдуарда Лобава выбралі фактычна без абмеркаванняў. Далейшыя дыскусіі на з’ездзе наконт абрання кіраўніцтва прывялі да таго, што давялося праводзіць тайнае галасаванне. У бюлетэні значыліся тры кандыдатуры: Дзмітрый Дашкевіч, Андрэй Цянюта і Вадзім Белы.
Андрэй Цянюта. Фота БелаПАНДашкевіч яшчэ да з’езду заяўляў аб сваіх планах адмовіцца ад кіраўніцтва арганізацыяй. Аднак цяпер ён прыняў супрацьлеглае рашэнне. Былы палітвязень патлумачыў гэта «крытычным становішчам у «Фронце», актывісты якога не могуць нармальна абраць кіраўніцтва».
Паводле вынікаў тайнага галасавання, у якім бралі ўдзел 49 асобаў, сустаршынямі «Маладога фронту» сталі тыя, хто набраў 50 % галасоў плюс адзін голас. Дашкевіч набраў 28 галасоў, Цянюта – 26, Белы – 23. Апошняму, такім чынам, не ўдалося набраць неабходнай колькасці галасоў.
У сувязі з тым, што адзін сустаршыня выбраны не быў, дэлегаты прынялі рашэнне правесці другую сесію з’езду. Мяркуецца, што яна адбудзецца напрыканцы года.
Выбары сустаршыняў не абышліся без невялікага разладу. Адзін з лідараў «Маладога фронту» ў Салігорску Іван Шыла абвінаваціў Цянюту, што той прывёз на з’езд «завезеных» дэлегатаў – не актывістаў арганізацыі, падае сайт «Mfront.net». Сам Цянюта сцвердзіў, што ўсе прысутныя ў залі – рэгіянальныя актывісты арганізацыі, якіх Іван проста не ведае.
МЯ, belsat.eu, паводле БелаПАН
