Памежны пропуск на дарозе з Горадні ў Літву ўрачыста адчынілі пасля рэканструкцыі.
Сёння зранку праз адноўлены пункт у вёсцы Прывалка праехаў першы аўтамабіль. Цяпер плыні транспарту ў абодвух кірунках праходзяць праз адзін будынак. Усталявалі таксама святлафоры. А для таго, каб пазбегчы канфліктных сітуацыяў, як гаворыцца ў прэс-рэлізе, з’явіліся відэаназіранне і аўдыёсістэмы.
Прапускная здольнасць пункту ў Прывалцы – такая ж, як на літоўскім баку. Гэта 1000 аўтаў за содні: 570 легкавікоў, 400 цяжкавікоў і 30 аўтобусаў.
У 2014 годзе тут мае запрацаваць абсталяванне, якое будзе сканаваць транспарт. Ягоны кошт складае 2,78 млн еўраў. Грошы вылучаць у межах Праграмы трансгранічнай супрацы «Латвія–Літва–Беларусь».
Дарэчы, пост цяпер мае ўласныя свідравіны, воданапорную вежу і трансфарматарную падстанцыю. Будаўнічыя працы працягваюцца, але руху яны не перашкаджаюць.
АК, belsat.eu