Набліжаецца чарговая малочная вайна з Расеяй?


https://youtu.be/-SoA2jZJ18g

Сустрэча беларускага і расейскага віцэ-прэм’ераў у Маскве адбылася, аднак Уладзімір Сямашка не здолеў дамовіцца з Аркадзем Дварковічам пра імпарт нафты ў Беларусь у тых аб’ёмах, на якія разлічваў урад. А гэта азначае, што краіна атрымае замест 21 млн т нафты толькі 18,5 млн т. {movie}Набліжаецца чарговая малочная вайна з Расеяй? |left|12346{/movie}

Гэта першы такога кшталту кантакт з таго моманту, калі распачаўся калійны канфлікт, выкліканы арыштам расейскага гендырэктара “Уралкалію”. Крымінальны пераслед бізнесоўца стаў адною з тэмаў размовы паміж палітыкамі. Аднак нічога новага ў гэтай справе, прынамсі, у публічнай прасторы, сказана не было. Апрача таго высветлілася, што ёсць шэраг прэтэнзіяў да беларускіх сельскагаспадарчых прадуктаў. Таксама адпаведныя ведамствы пачалі правяранне паводле факту рээкспарту ў Расею некаторых тавараў трэціх краінаў пад выглядам беларускіх. Апошні раз Расея ўздымала пытанне рээкспарту ў 2009-м годзе падчас гэтак званай цукровай вайны.

Палітыкі размаўлялі таксама і на традыцыйную сёлета тэму расейска-беларускіх холдынгаў, аднак тут – без зменаў. Дакладна можна сказаць, што Беларусь чакае малочная вайна. На мінулым тыдні галоўны санітарны доктар Расеі Генадзь Анішчанка заявіў, што мае пытанне да беларускіх малочных прадуктаў. Сёння ён сустрэўся з Васілём Жарком, беларускім міністрам аховы здароўя. Высветлілася, што ў хуткім часе гэты сегмент прадукцыі можа быць забаронены для продажу ў Расею.

Як вынік – з пазіцыі сілы размаўляла Масква, хаця падавалася, што пасля арышту гендырэктара “Уралкалію” Менск узяў закладніка як важкі аргумент у будучых перамовах. Аднак Крэмль абраў наступальную тактыку: вылучыў умовы і даў кіраўніцтву Беларусі час падумаць. Канчатковыя рашэнні ва ўсіх пытаннях будуць прынятыя на наступным тыдні, ды залежаць яны, як сказаў Аркадзь Дварковіч, ад агульнай сітуацыі.

Аліна Радачынская, Масква

Глядзі таксама
Каментары