“Амбасовішча” – гэтак называецца фестываль беларускай музыкі, які праходзіць у Менску і рыхтуецца высілкамі амбасады ЗША ўжо дзявяты год. Яго арганізатары заяўляюць, што перадусім хочуць падтрымаць незалежную беларускую культуру. Таму сярод запрошаных на гэтую імпрэзу шмат знакавых асобаў, чыя прысутнасць у дзяржаўных медыях не пажаданая.
“Вялікі дзякуй арганізатарам за тое, што яны дапамагаюць у развіцці беларускай музыкі не першы год. Гэта вельмі важна. І дай бог жыцця і здароўя фестывалю “Амбасовішча”, – кажа музыка Зміцер Вайцюшкевіч.
У першыя гады фестываль адкрываў амбасадар ЗША ў Беларусі, але з часу дыпламатычнага канфлікту між нашымі краінамі ў 2008 годзе абавязкі гаспадара “Амбасовішча” выконвае часовы павераны.
{movie}Агляд падзеяў культуры (04.09.2013)|right|12325{/movie}
Сёлета ўпершыню такі гонар меў Ітан Гоўлдрыч. Ён адзначыў: “Амбасада ладзіць гэты фестываль ужо шмат гадоў. І мы вельмі радыя, што абмежаванні, якія існавалі для творчых асобаў, сталі менш жорсткія. Мы працягнем ладзіць гэты фестываль, каб у музыкаў была магчымасць выказваць свае думкі, бо лічым, што грамадства не мае баяцца таго, што кажуць творчыя людзі. І мы радыя даць ім магчымасць выказацца і падзяліцца сваімі ідэямі”.
На сяброўскі канцэрт “Амбасовішча” штогод склікаюцца вядомыя дзеячы мастацтва – музыкі, пісьменнікі, мастакі, арт-менеджары. Сярод сёлетніх выступоўцаў былі Лявон Вольскі, Аляксандр Памідораў, Зміцер Вайцюшкевіч, гурт “Рэха”.
Іншыя тэмы: Для здымак “на 90 % беларускага” моладзевага серыялу “Сезон ідэяў” нумары на аўтах замянілі на расейскія, а Менск – на Ноўнэймск. Серыял “Вышэй за неба” пасля доўгіх скандалаў афіцыйна выходзіць у эфір. Брытанская пісьменніца Соўфі Гэна дасць новае жыццё Эркюлю Пуаро. Гурт “Pixies” запісаў альбом і паказаў кліп – упершыню за 22 гады.
Сяргей Будкін, Адэля Дубавец, belsat.eu
