Васіль Дзягцярык мае 35 акцыяў «Івацэвічдрэву». Ён кажа, што нядаўна атрымаў Br 76 тыс. дывідэндаў за 2011 год.
«Апошні раз плацілі, калі ў нас «Дажынкі» былі, – недзе ў 2005 годзе. А цяпер заплацілі за 2011 год. Атрымліваецца, што за тыя гады нічога і не плацілі ўвогуле. Мне нават смешна, што такое прадпрыемства, якое плоціць вялікія падаткі раёну, а сваіх людзей пакідае. Я патэлефанаваў сябрам, кажу, ідзіце атрымлівайце дывідэнды… Пытаюць колькі, я ім кажу, што на курыцу будзе дастаткова», – гаворыць спадар Васіль.
Суразмоўца кажа, што для атрымання гэтых Br 76 тыс. яму давялося ісці ў банк і адкрываць адмысловы рахунак. Ён распавёў таксама, што ў пачатку 2000-ых гадоў з дывідэндаў можна было больш чаго купіць – нейкага адзення нават. Цяпер жа Васіль Дзягцярык здзіўляецца, што прадпрыемства мадэрнізавалі, а грошай акцыянерам плоцяць меней.
Васіль Дзягцярык падлічыў, што адна ягоная акцыя прынесла Br 2 тыс. 100 дывідэндаў. А, да прыкладу, у першым квартале 2012 года Ляхавіцкі малочны завод плаціў больш за Br 15 тыс. за акцыю, Пухавіцкі камбінат хлебапрадуктаў – больш за Br 19 тыс. за акцыю. Пры гэтым «Івацэвічдрэў» лічыцца найбольш паспяховым прадпрыемствам у раёне.
«Відаць, за нашыя дывідэнды і зрабілі тую мадэрнізацыю», – жартуе мужчына. Як раней паведамляў «Белсат», нягледзячы на гэткія прыклады, афіцыйныя асобы заяўляюць, што выплаты дывідэндаў у дзяржаўны бюджэт растуць. А старшыня Дзяржкаммаёмасці Георгій Кузняцоў сцвярджаў, што ў 2012 годзе толькі 7 % акцыянерных прадпрыемстваў не выплочвалі дывідэнды зусім.
Эканаміст Леанд Заіка кажа, што склалася такая сітуацыя, калі дывідэнды дзяржаве плоцяцца нашмат спраўней, чым простым акцыянерам. І, паводле ягоных падлікаў, да 98 % прадпрыемстваў не плоцяць акцыянерам дывідэндаў увогуле.
“Выплочваць не будуць дывідэндаў да тых часоў, пакуль гэтыя прадпрыемствы не будуць рэальна прыватызаваныя,” – заявіў Леанід Заіка.
Найбольшую суму дывідэндаў у Беларусі выплочвае «Беларуськалій» – да 45 % усіх дывідэндаў. Адзіны акцыянер гэтага прадпрыемства – дзяржава. Эксперты выказваюць меркаванне, што канфлікт з «Уралкаліем» і скарачэнне вытворчасці «Беларуськалію» можа адбіцца і на выплатах дывідэндаў.
Простым жа беларусам эканамісты не раяць укладацца ў набыццё акцыяў прадпрыемстваў, бо пакуль застаецца сумнеўным атрыманне з гэтага значнага прыбытку.
Кастусь Будчак, belsat.eu
