Міліцыянты схапілі відэааператара інфармацыйнай агенцыі БелаПАН Васіля Сямашку, калі той выконваў рэдакцыйнае заданне.
Журналіста затрымалі каля Кастрычніцкага РУУСу Менску, калі ён здымаў на відэакамеру актывістаў кампаніі «Гавары праўду!», якія выходзілі з пастарунку. Сёння дзеячаў даставілі ў РУУС Кастрычніцкага раёну, а праз некалькі гадзінаў пачалі адпускаць.
Пратрымаўшы гадзіну, міліцыянты відэааператара адпусцілі, папярэдне выдаліўшы адзняты матэрыял – інтэрв’ю з намеснікам старшыні грамадзянскай кампаніі «Гавары праўду!» Андрэем Дзмітрыевым.
Паводле Сямашкі, выдаленне знятага сюжэту міліцыянты патлумачылі тым, што інтэрв’ю адбывалася на тле будынку РУУСу. Ніякіх папераў у дачыненні журналіста ў міліцыі не складалі.
Сямашка паведаміў, што міліцыянты ставіліся да яго «нармальна», аднак не патлумачылі прычыны, праз якую адбылося затрыманне.
МЯ, belsat.eu, паводле БелаПАН