Прачытаўшы навіну пра тое, што прэзідэнт ЗША Барак Оўбама завёў сабаку, “Белсат” зацікавіўся: якіх жывёлінаў трымалі іншыя гаспадары Белага дому? Аказалася, там жылі алігатар, каёт, бегемот, зебра…
Барак Оўбама завёў хатняга гадаванца – партугальскага воднага сабаку на мянушку Боў. Калі прэзідэнта спыталі, ці знайшоў новы жыхар Белага дому спальнае месца, ён адказаў: “Не ў маім ложку”. У 1999 годзе ў ЗША паўстаў Музей хатніх жывёлінаў прэзідэнтаў. Ён сабраў звесткі пра тое, хто і якіх гадаванцаў трымаў у Белым доме.
Джордж Ўошынгтан быў не толькі першым амерыканскім прэзідэнтам, але і адзіным, хто не жыў у Белым доме. Калі б яму было наканавана пераехаць туды, давялося б шукаць месца для вясёлай кампаніі: 8 коней, 17 ганчакоў, папугая сваёй жонкі Марці ды каня прыёмнай унучкі Нэлі Кастыс.
Першым гаспадаром Белага дому стаў Джон Эдамз, які перабраўся туды ў 1800 годзе. Ён збудаваў там першую стайню для сваёй чатырохногай улюбёнкі Клеапатры. Эдамз пратрымаўся ў рэзідэнцыі нядоўга. Ужо ў 1801-м яго замяніў Томас Джэфэрсан (1801–1809)*, разам з дзвюма французскімі аўчаркамі ды перасмешнікам.
Бадай, самых экзатычных гадаванцаў меў пяты прэзідэнт ЗША Джон Кўінсі Эдамз (1825–1829): алігатара (падарунак маркіза дэ Ляфаета) і шаўкапрадаў, якіх разводзіла ягоная жонка Луіза. Цікава, што гэта ні ў каго не выклікала пытанняў.
А восьмаму прэзідэнту Марціну ван Бюрэну (1837–1841) двух тыгранятаў, падораных султанам Аману, давялося аддаць у заапарк: гэтага запатрабаваў парламент. Ягоны наступнік Ўільям Гэнры Гэрысан (1841), відаць, вырашыў не выпрабоўваць лёсу і прывёў у Белы дом карову. Пасля Гэрысана гаспадаром рэзідэнцыі стаў Джон Тайлер (1841–1845), вядомы тым, што паставіў на магіле свайго каня Генерала камень з эпітафіяй.
19-ты прэзідэнт ЗША Радэрфард Гэйз (1877–1881) быў уладальнікам першага сіямскага ката, які трапіў на тэрыторыю Амерыкі. Ягоны наступнік Гроўвэр Кліўлэнд меў перасмешнікаў, канарэек, кокер-спаніэля і японскага пудзеля.
Апошні раз Белы дом бачыў карову ў часы прэзідэнцтва Ўільяма Тэфта (1909–1913). Але ягоны наступнік Ўудраў Ўілсан яшчэ працягваў сельскагаспадарчыя традыцыі: ён трымаў авечак, з якіх атрымлівалі горы воўны. Найбольшую калекцыю сабакаў мелі Кэлвін Кулідж (1923–1929) з жонкаю Грэйс: 12. Увогуле, гэтая пара можа паспрачацца з Рузвэлтамі, бо даглядала яшчэ і гусь, асла, рысь, янота, а ў падарунак атрымала ільвянятаў, валабі, мядзведзя і карлікавага бегемота.
Аліна Кашкевіч, belsat.eu