Глобус пастанавіў, каму дастанецца стол Караткевіча


Пра жаданне аддаць стол класіка беларускай літаратуры ў «добрыя рукі» літаратар і мастак Адам Глобус пісаў у сваім «ЖЖ».

Паведамленне з’явілася напрыканцы ліпеня, і гаспадар знайшоўся даволі хутка. Адам Глобус атрымаў шмат прапановаў, у асноўным індывідуальных, быў і ліст ад Аршанскага музею. Аднак наш суразмоўца не хацеў, каб стол Караткевіча і далей стаяў у кагосьці дома або паехаў у правінцыю.

Аргумент першы: яго мусяць бачыць як мага больш людзей. Аргумент другі: большасць твораў за ім (у тым ліку «Каласы пад сярпом тваім» і «Хрыстос прызямліўся ў Гародні») напісаныя ў Менску. Да таго ж, дадае спадар Глобус, Аршанскі музей Караткевіча ўжо атрымаў ад яго нямала рэчаў, у тым ліку кніг з аўтографамі (іх перадаў пісьменнік Уладзімер Арлоў).

Цікава, што ні Дзяржаўны музей гісторыі беларускай літаратуры, ні Літаратурны музей Максіма Багдановіча на прапанову не адрэагавалі. Магчыма, бо ў абодвух цяпер рамонт.

Былі ідэі аддаць стол адной са сталічных школаў. Але перамагла прапанова перакладчыцы і літаратаркі Марыйкі Мартысевіч: у верасні каштоўны экспанат пераедзе ў кнігарню «ЛогвінаЎ», якая месціцца ў галерэі «Ў». «Туды прыходзіць шмат людзей, і нарэшце кнігарня і галерэя будуць мець нейкую сакральную рэч, звязаную з беларускаю літаратураю», – патлумачыў Адам Глобус.

Стол захоўваўся на лецішчы бацькоў спадара Глобуса. За ім Уладзімір Караткевіч напісаў усе свае асноўныя творы. «Толькі напрыканцы жыцця Валянціна Браніславаўна купіла мужу новы вялікі стол. Выкінуць стары было шкада. Караткевічы папрасілі забраць стол на нашую дачу», – распавёў Адам Глобус і дадаў, што свае дзённікі пісаў тут і ягоны бацька.

Аліна Кашкевіч, belsat.eu

Глядзі таксама
Каментары