Міністр МУС Украіны заплаціць галавою за згвалтаванне жанчыны двума міліцыянтамі?

Згвалтаванне, што выклікала сапраўдны бунт

Прычынаю для стыхійнага мітынгу ў Кіеве сталіся драматычныя падзеі на пачатку ліпеня ў сяле Врадзіеўка (Врадіївка). Уначы на 2 ліпеня мясцовыя жыхары пайшлі штурмам на раённае аддзяленне міліцыі. Натоўп выламаў браму, пабіў вокны ў аддзеле, разграміў міліцэйскія аўты. Супраць пачалі выкарыстоўваць слезацечны газ і дубінкі.

Абурэнне мясцовых жыхароў выклікала навіна пра згвалтаванне мясцовай жыхаркі. Галоўныя падазраваныя – два міліцыянты. Сяляне гавораць, што гэта не першае такое злачынства з боку мясцовых міліцыянтаў. Бадай што найбольш цынічнае ў гэтай гісторыі тое, што ахвяра гвалту назвала прозвішчы злачынцаў, аднак іх адразу не адсунулі ад працы. Больш за тое, адзін з міліцыянтаў прыходзіў да пацярпелай у шпіталь, каб… узяць паказанні.

Міністр унутраных справаў Віталь Захарчанка паабяцаў, што вінаватых пакараюць. Аднак сяляне патрабуюць звальнення ўсіх працаўнікоў раённага аддзелу і пракуратуры. Але на гэтае ўлады не пайшлі.

Салідарныя ў Кіеве

Уначы на 19 ліпеня ў цэнтры Кіева адбыўся стыхійны мітынг пратэсту супраць свавольства і карупцыі ўкраінскай міліцыі. Жыхары Врадзіеўкі пешкі дайшлі да Кіева і распачалі пратэст на Майдане Незалежнасці. Да іх пачалі далучацца жыхары Кіева.

{movie}Разгон мітынгу пратэсту ў Кіеве|right|11683{/movie}

Начны мітынг быў нешматлюдным – прыблізна 200 асобаў. Тым не менш на яго разгон кінулі байцоў спецпадраздзялення “Беркут” ды міліцыянтаў – агулам з тысячу праваахоўнікаў. Яны арыштавалі некалькі дзясяткаў удзельнікаў акцыі, разграмілі намётавае мястэчка. Ранкам мітынгоўцы вярнуліся на пляц, аднак іх акцыя ізноў скончылася затрыманнямі.

Міліцыя сталася ворагам?

Штурм раённага аддзелу ў Врадзіеўцы – не адзінкавы такі выпадак. Гандляры аднаго з кіеўскіх рынкаў вырашыліся на штурм пастарунку пасля таго, як міліцыянт ударыў кулаком у жывот жанчыну. Відавочцы хацелі схапіць міліцыянера, але той уцёк ды схаваўся за сценамі пастарунку. Гандляры павалілі плот ля будынку, аднак урывацца ў будынак з узброенымі міліцыянтамі не сталі.

Зміцер Ягораў, belsat.eu