Адам Глобус пасля 4-гадовага перапынку выдаў новую кнігу – “Імёны”. Пісьменнік сабраў успаміны пра тых, каго ведаў асабіста, а гэта і літаратары, і мастакі, і педагогі. Сярод іх такія асобы, як Уладзімір Караткевіч і Анатоль Сыс. Навіны культуры.
Канцэпцыя “Імёнаў” адрозніваецца ад скандальных “сУчаснікаў”, адной з ранейшых кнігаў пісьменніка, якая таксама складалася з кароткіх назіранняў за героямі нашага часу.
{movie}Агляд падзеяў культуры (12.07.2013) |right|11562{/movie}
АДАМ ГЛОБУС, ПІСЬМЕННІК:
“Я нарэшце знайшоў ход, як стварыць не прытарна, не выдумана сапраўднага станоўчага героя. З гэтай мярзотнасці, дробнасці, сУчаснасці, з гэтай рэальнасці бачыш, як раптам пачынае вырастаць вялікая постаць – і вырастае да станоўчага героя”.
Кніга “Імёны. Літаратурныя партрэты” выйшла ў серыі “Бібліятэка “Беларускага Калегіюму”, дзе раней пабачылі ўжо свет кнігі Віталя Сіліцкага, Сяргея Харэўскага, Алеся Смаленчука.
АЛЕСЬ АНЦІПЕНКА, КААРДЫНАТАР СЕРЫІ:
“Ідэя вельмі проста – прэзентаваць найлепшыя, як лічаць самі аўтары, тэксты, якія адлюстроўваюць сённяшнюю інтэлектуальную, культурніцкую, літаратурную сітуацыю ў нашай краіне. Глобус у пэўным сэнсе знакавая фігура для нашай літаратурнай інтэлектуальнай сітуацыі. Ягонае імя ўпрыгожвае галерэю тых аўтараў, якія прэзентаваныя ў гэтай серыі”.
Серыя “Бібліятэка “Беларускага Калегіюму” будзе працягвацца. Ужо рыхтуюцца да друку новыя кнігі Сяргея Дубаўца і Пятра Рудкоўскага.
Сяргей Будкін, belsat.eu
