«Залатая акцыя вяртаецца»?
У выпадку ўступлення ў сілу паправак у Закон аб прыватызацыі, у Беларусі могуць рэанімаваць «залатую акцыю» ў больш жорсткай форме, чымся гэта было раней. Папраўкі ў гэты закон ужо прынялі ў парламенце ў першым чытанні.
Раней для ўвядзення «залатой акцыі» патрабавалася афіцыйная пастанова і выпадкаў увядзення «залатой акцыі» было няшмат. Паводле Валерыя Фадзеева, з новымі нормамі ўводзіць дзяржаўных прадстаўнікоў можна будзе практычна ў любым акцыянерным таварыстве, якое калісьці было дзяржаўным прадпрыемствам.
«Фактычна ўводзіцца так званы ўладальніцкі нагляд чыноўнікаў, – гаворыць Фадзееў. – Гэта дрэннае рашэнне: дзяржава неабгрунтавана ўрываецца ў сферу прыватных інтарэсаў, парушаецца прынцып свабоды волі».
Захацеў – наклаў вета
Згодна з законапраектам, дзяржаўныя прадстаўнікі могуць прызначацца нават у тыя акцыянерныя таварыствы, якія ствараліся ў працэсе прыватызацыі ды ў якіх дзяржава не мае долі. Такія прадстаўнікі могуць прыпыняць выкананне пастановаў агульнага сходу акцыянераў у выпадку, «калі рэалізацыя гэтых пастановаў супярэчыць грамадскай карысці і бяспецы, наносіць шкоду навакольнаму асяроддзю, уціскае правы і законныя інтарэсы іншых асобаў».
Гэтыя нормы, на думку прадстаўнікоў бізнес-супольнасці, могуць трактавацца занадта шырока і ўжывацца паводле суб’ектыўнага меркавання чыноўнікаў.
Механізм «залатой акцыі» дзеяў у Беларусі з другой паловы 1990-х гадоў. Ён даваў дзяржаве асаблівае права на кіраванне прадпрыемствамі нават у тых выпадках, калі дзяржаўная доля ў іх адсутнічала. У 2008 годзе «залатую акцыю» скасавалі.
МЛ, паводле БелаПАН
