Шматлікія журналісты, якія набылі квіткі на рэйс “Аэрафлоту” Масква–Гавана, якім, як меркавалі, меў адправіцца Эдўард Сноўдэн, паведамляюць, што яго няма на борце.
Ягоную адсутнасць пацвердзіла крыніца “Інтэрфаксу” ў сілавых структурах. “Эдўарда Сноўдэна на борце няма, ён не паляцеў гэтым рэйсам”, – заявіў суразмоўца агенцтва.
Прамых авіярэйсаў з Масквы ў Эквадор няма.
Здраднік ці герой?
30-гадовы былы супрацоўнік ЦРУ Сноўдэн збег з Гавайскіх астравоў у Гон-Конг у траўні, незадоўга да з’яўлення ў прэсе выкрывальных артыкулаў пра сакрэтныя аперацыі амерыканскіх спецслужбаў і сачэнні ў інтэрнэце. З перададзеных ім матэрыялаў, сярод іншага, стала вядома, што амерыканскія спецслужбы атрымалі доступ да інфармацыі пра мільёны тэлефонных званкоў, а таксама да сервераў найбуйнейшых інтэрнэт-кампаніяў.
Грамадская думка ў ЗША падзялілася: хтосьці лічыць Сноўдэна героем, хтосьці – здраднікам. У ЗША яму прад’яўлена некалькі абвінавачанняў, сярод якіх – шпіянаж.
У Эквадор праз Маскву і Гавану?
Эдўард Сноўдэн меў вылецець з маскоўскага аэрапорту Шарамецьева, дзе ён правёў ноч па дарозе з Гон-Конгу, у Гавану. Адтуль маладзён меўся накіравацца ў Эквадор, у якога папрасіў палітычнага прытулку. У Шарамецьева Сноўдэн мог сустрэцца з паслом Эквадору, машыну якога ля будынку аэрапорту заўважылі рэпарцёры.
Раней паведамлялася, што Сноўдэн можа выехаць у Беларусь. Былы працаўнік ЦРУ шукае падтрымання перадусім у краінах, падкрэсліваюць адмыслоўцы, у якіх моцная антыамерыканская рыторыка і праблемы з захаваннем правоў чалавека.
Вашынгтон настойвае на экстрадыцыі
Вашынгтон чакаў ад уладаў Расеі, што тыя разгледзяць «усе наяўныя магчымасці», каб перадаць былога працаўніка ЦРУ і Агенцтва нацыянальнай бяспекі Эдўарда Сноўдэна ўладам ЗША.
Як заявіла прадстаўніца Рады нацыянальнай бяспекі Кэтлін Гэйдэн, Злучаныя Штаты таксама выказалі сваю нязгоду з уладамі Гон-Конгу і КНР у сувязі з тым, што яны дазволілі Сноўдэну вылецець з Гон-Конгу ў Расею.
«Гэткія паводзіны не спрыяюць умацаванню адносінаў ЗША з Гон-Конгам і КНР», – падкрэсліла Гэйдэн.
ЗША спрабавалі таксама дамагчыся выдачы Сноўдэна з Гон-Конгу, аднак гонконгскія ўлады сцвярджаюць, што амерыканскі запыт не аформілі належным чынам, і ў іх не было законных падставаў для таго, каб перашкодзіць вылету агента.
МЯ, belsat.eu, паводле Бі-бі-сі
