Міністра замежных справаў Беларусі Уладзіміра Макея выключылі са спісу асобаў, якім забаронены ўезд на тэрыторыю ЕЗ. Гэткую пастанову прынялі сёння на паседжанні Рады міністраў замежных справаў ЕЗ у Люксембурзе.
У той жа час ён застаецца ў спісе асобаў, рахункі ды ўласнасць якіх на тэрыторыі ЕЗ замарожаныя.
«Рада спрашчае дыпламатычныя кантакты паміж ЕЗ і Беларуссю, – гаворыцца ў паведамленні прэс-службы Рады ЕЗ. – Каб палегчыць кантакты, Рада сёння прыпыніла забарону на ўезд для беларускага міністра замежных справаў Уладзіміра Макея. Макей застаецца ў спісе асобаў, у дачыненні якіх дзеяць абмежавальныя захады, але візавыя санкцыі ў дачыненні яго выкарыстоўвацца не будуць».
Гэтае рашэнне – не змена палітыкі ЕЗ у дачыненні Беларусі, падкрэсліваецца ў паведамленні. «ЕЗ працягне сваю палітыку крытычнага ўзаемадзеяння з Беларуссю, у тым ліку і сваю палітыку санкцыяў, у мэтах садзейнічання павазе правоў чалавека, вяршэнства закону і дэмакратычных прынцыпаў у Беларусі», – паведамляе прэс-служба.
Адзначаецца таксама, што Рада вернецца да гэтага пытання пры штогадовым пераглядзе санкцыяў у дачыненні Беларусі сёлета ў кастрычніку і вырашыць, ці працягваць прыпыненне санкцыяў.
Пра тое, што візавыя санкцыі ЕЗ супраць Макея могуць зняць у чэрвені, паведамляў тэлеканалу «Белсат» віцэ-прэзідэнт Еўрапарламенту Яцэк Пратасевіч, а таксама намеснік міністра замежных справаў Літвы Андрус Крывас.
Уладзіміра Макея ўнеслі ў «чорны спіс» ЕЗ у студзені 2011 года як кіраўніка Адміністрацыі прэзідэнта Беларусі, які меў дачыненне да жорсткага разгону акцыі пратэсту 19 снежні 2010 года і наступнага пераследу актывістаў апазіцыі.
МЯ, belsat.eu, паводле БелаПАН