Вонкавая пазыка Беларусі імкліва расце і без новых крэдытаў


Не гледзячы на тое, як дагэтуль урад знаходзіць сродкі, каб аддаць вялізарныя адсоткі па вонкавай запазычанасці, больш за $ 3 млрд сёлета, памеры новых налічэнняў таксама ўражваюць.

Толькі за першы квартал 2013 года запазычанасць вырасла на $ 375,5 млн, што павялічыла агульны доўг да $ 12,4 млрд. Дзяржаўная пазыка Рэспублікі Беларусь на 1 траўня 2013 года павялічылася ў параўнанні з пачаткам года на Br 5,6 трлн або на 4,4 %.

Тым часам Менск чакае на атрыманне вялізарнага крэдыту на будаўніцтва АЭС і павялічвае таксама і ўнутраную дзяржаўную пазыку – з пачатку года яна вырасла на Br 1,4 трлн.

Паводле Міністэрства фінансаў, павелічэнне ўнутранай дзяржпазыкі ў 2013 годзе абумоўленае размяшчэннем валютных дзяржаўных аблігацыяў для юрыдычных і фізічных асобаў і ростам афіцыйнага курсу долара ЗША адносна беларускага рубля. Незалежныя эканамісты неаднаразова зазначалі, што калі Менск не прыдумае новай геніяльнай схемы заробку валюты, як было з разбаўляльнікамі летась, то выплаты крэдытаў, новыя запазычанасці, рост заробкаў пры малой вытворчасці плюс забітыя нікому не патрэбнаю тэхнікаю склады могуць прывесці да паўтору калапсу 2011 года.

У.Ш., belsat.eu

Глядзі таксама
Каментары