Савет Міністраў хоча скараціць «Спіс гістарычна-культурных каштоўнасцяў Беларусі»


Мясцовыя выканкамы, згодна з адпаведным даручэннем, прыняліся рыхтаваць прапановы для выключэння помнікаў са спісу. У Бабруйску вырашылі, што статусу каштоўнасці не заслугоўваюць 15 будынкаў крэпасці ХІХ стагоддзя.

Як распавёў Антон Астаповіч, старшыня Беларускага добраахвотнага таварыства аховы помнікаў гісторыі і культуры, бабруйскі гарвыканкам падчас інвентарызацыі комплексу Бабруйскай крэпасці вылучыў 15 будынкаў, якія прапанаваў пазбавіць статусу гісторыка-культурнай каштоўнасці.

Гэтая праца, паводле спадара Астаповіча, вядзецца ў межах даручэння Савету Міністраў №05/206-88 ад 23.03.2013 года «Аб неабходнасці аналізу існага Дзяржаўнага спісу гістарычна-культурных каштоўнасцяў Рэспублікі Беларусь і ўнясення прапановаў для яго скарачэння».

{movie}Матэрыял “Аб’ектыву” пра скарачэнне спісу гістарычных каштоўнасцяў|right|10502{/movie}

Антон Астаповіч адзначыў, што Таварыства аховы помнікаў гісторыі ды культуры ўжо накіравала лісты з абгрунтаваннем незаконнасці ды недапушчальнасці выключэння помнікаў са Спісу гісторыка-культурных каштоўнасцяў. Даручэнне Савету Міністраў, паводле Астаповіча, – гэта адкрытае парушэнне Закону «Аб ахове гістарычна-культурнай спадчыны Рэспублікі Беларусь». Таму на імя Анатоля Тозіка накіравалі ліст з патрабаваннем адклікаць даручэнне і спыніць працу паводле яго.

Старшыня Таварыства аховы помнікаў упэўнены, што спіс скарачаюць у той час, як яго трэба пашыраць, «каб зняць адказнасць – як з чыноўнікаў, гэтак і з уласнікаў помнікаў, каб спрасціць сабе жыццё».

«Па сутнасці, дзяржава адмаўляецца ад сваіх абавязкаў, якія сама на сябе некалі ўзяла – абараняць помнікі. Бо што напісанае на шыльдах на сценах помнікаў – ахоўваецца дзяржаваю. Вось з гэтага абавязку ахоўваць чыноўнікі зараз і хочуць вызваліцца. Каб потым, у выпадку пашкоджання ці знішчэння помніку, не несці ніякай адказнасці», – каментуе намеры ўладаў бабруйскі краязнаўца Ігар Ткачоў.

Бабруйская крэпасць – помнік ваеннай фартыфікацыі. Будавалася ў 1810–1812 гадах падчас рыхтавання да вайны з напалеонаўскаю Францыяй. Усяго ў комплекс крэпасці ўваходзяць 49 будынкаў, якія маюць статус гісторыка-культурнай каштоўнасці. На сённяшні дзень будынкі ансамблю крэпасці – самыя старажытныя ў Бабруйску.

Марына Маўчанава, belsat.eu

Стужка навінаў