Аляксандр Класкоўскі: Еўропа не пойдзе эканамічнаю вайною на Беларусь


Каментуючы «вайну за санкцыі», якая пачалася паміж прадстаўнікамі беларускай апазіцыі падчас канферэнцыі «Дыялог аб мадэрнізацыі з беларускім грамадствам» у Бруселі, палітолаг адзначыў, што еўрапейцы не бачаць сёння вострай рэвалюцыйнай сітуацыі ў Беларусі ці каб апазіцыя мела нейкі заўважны ўплыў у краіне.

«На гэтым фоне для Еўропы пытанне стаіць так: а як мы патлумачым сваім падаткаплатнікам, што вось цяпер мы перакрываем усе бізнес-кантакты з Беларуссю?»
Таму, на думку эксперта, увядзенне рэальных санкцыяў наўрад ці магчымае.

Аляксандр Мілінкевіч фота belsat.euАляксандр Мілінкевіч фота belsat.euСтаршыня руху «За свабоду» Аляксандр Мілінкевіч на выступе ў Еўрапарламенце выказаў меркаванне, што санкцыі Еўропы супраць Беларусі не маюць сэнсу. «Я не бачу альтэрнатывы дыялогу, а санкцыі ні да чаго добрага не прыводзяць: палітвязняў не выпускаюць, страху больш, уплыў апазіцыі меншы, праеўрапейскія настроі падаюць», – зазначыў палітык у каментары агенцтву БелаПАН.

На думку Мілінкевіча, больш жорсткія эканамічныя санкцыі, да якіх Еўразвяз заклікаюць некаторыя прадстаўнікі апазіцыі, штурхаюць Беларусь у Расею. «Калі нехта кіруецца помстаю Лукашэнку ці працуе на расейскую стратэгію па анэксіі Беларусі, тады, зразумела, што яму трэба заклікаць да санкцыяў», – мяркуе лідар руху «За Свабоду».

Андрэй Саннікаў фота belsat.euАндрэй Саннікаў фота belsat.euАндрэй Саннікаў пазіцыю руху «За Свабоду» назваў «легітымізацыяй рэжыму Лукашэнкі». На ягоную думку, адзіна правільным будзе поўнае спыненне эканамічных адносінаў Еўропы з Беларуссю.

Не падзяляе гэткай катэгарычнасці старшыня АГП Анатоль Лябедзька, падкрэсліваючы, што АГП не падтрымлівае тых захадаў, што пагоршаць і так гаротны стан шмат якіх беларусаў, якія працуюць на дзяржаўных прадпрыемствах.

Вайну паміж апазіцыйнымі партыямі ў пытанні эканамічных санкцыяў Аляксандр Класкоўскі тлумачыць імкненнем кожнай з групаў апазіцыі ўтрымаць і пашырыць сваю нішу. «Адны выйграюць пры пацяпленні дачыненняў паміж Менскам і Еўропаю, і, натуральна, што яны лабіююць гэткі падыход. Іншыя адчуваюць, што, калі пачнецца наўпроставы дыялог паміж Бруселем і Менскам, яны выпадаюць з працэсу. Адпаведна, змяншаецца іхны уплыў, тыя рэсурсы, на якія яны могуць прэтэндаваць», – мяркуе спадар Класкоўскі.

Палітолаг лічыць, што найбольш дзейснае выйсце на сённяшні дзень – гэта спрабаваць развязаць беларускае пытанне праз пакетнае пагадненне, шляхам узаемных саступак. З боку Беларусі гэта, найперш, – вызваленне палітвязняў.

Тое, што санкцыі падштурхнуць Беларусь у адбымкі Масквы, на думку Класкоўскага, не так адназначна. Хоць у выпадку эканамічнай ізаляцыі з боку Еўропы, Лукашэнка найхутчэй будзе спрабаваць паправіць сітуацыю за кошт Расеі, і тады давядзецца саступаць чарговыя прадпрыемствы, што, зразумела, не павялічвае беларускай незалежнасці.

Заклікаючы да санкцыяў, палітыкі спадзяюцца, што гэта прывядзе да масавай незадаволенасці насельніцтва, і ўздыме яго нарэшце на барацьбу. Але Аляксандр Класкоўскі сумняецца ў рэальнасці такога сцэнару і спасылаецца на крызіс 2011 года, які, паводле палітолага, паказаў, што, «нават калі ўдвая падае ўзровень жыцця, масы на вуліцы не выходзяць, а наадварот – трымаюцца за свае працоўныя месцы і паводзяць сябе цішэй за ваду, ніжэй за траву».

Класкоўскі ўзгадвае, як праваліліся спробы апазіцыі арганізаваць народныя сходы і таму падсумоўвае, што схема прыхільнікаў санкцыяў – зніжаецца жыццёвы ўзровень, масы палітызуюцца і пачынаюць вулічную барацьбу – дасюль не спрацоўвала, і няма гарантыі, што раптам спрацуе ў выніку поўнамаштабнай эканамічнай вайны.

У той жа час Класкоўскі адзначае, што шлях перамоваў і пакетнага пагаднення, хоць і выглядае больш дзейсным, але гэтаксама не гарантуе дэмакратызацыі беларускага рэжыму. «Саступкі, хутчэй за ўсё, будуць дэкаратыўнымі. Але і гэта ўжо нейкая дынаміка, акно магчымасцяў для Беларусі», – лічыць эксперт.

Марына Маўчанава, belsat.eu

Глядзі таксама
Каментары