Дзе пабываў і што пабачыў кіраўнік Беларусі?


Аляксандра Лукашэнкі няма ў Беларусі ўжо 2 тыдні. З цёплых краёў ён мае вярнуцца неўзабаве, бо ўжо заўтра мае адбыцца ягонае спатканне з генеральным сакратаром арганізацыі Дамовы аб калектыўнай бяспецы Мікалаем Бардзюжы.

Прысутнасць лідара Беларусі чакаецца таксама на адкрыцці Купалаўскага тэатру 29 сакавіка. Мяркуецца, што ён паглядзіць «Паўлінку» – класіку беларускай сцэны з новымі акторамі і дэкарацыямі.

«Цягам 2 тыдняў без Лукашэнкі ў Беларусі адбыўся хіба толькі снежны буран», – жартуюць інтэрнаўты.


Просмотреть Дзе апошнім часам пабываў Аляксандр Лукашэнка? на карте большего размера

Кіраўнік Беларусі яшчэ не ведае, што не атрымае крэдыт фота president.gov.byКіраўнік Беларусі яшчэ не ведае, што не атрымае крэдыт фота president.gov.byАпошнім часам кіраўнік Беларусі ўвесь час у дарозе. Не паспеў ён вярнуцца з Венесуэлы з пахавання свайго сябра Уга Чавэса, як 14 сакавіка адправіўся на сустрэчу з прэзідэнтам Расеі ў межах чарговага паседжання Найвышэйшага дзяржсавету Саюзнай дзяржавы. Лукашэнка хацеў дамовіцца пра чарговы крэдыт для Беларусі памерам $ 2 млд. Крэмль аднак абумовіў выдачу крэдыту маштабнаю прыватызацыяй буйных беларускіх прадпрыемстваў. Лукашэнка паспеў уручыць тады Пуціну ордэн Дружбы народаў і падпісаць пагадненне аб будаўніцтве беларускай даследніцкай станцыі ў Антарктыдзе.

З Пецярбургу кіраўнік Беларусі паляцеў у Інданезію. Лукашэнка падкрэсліў, што візіт у гэтую краіну падрыхтоўваўся беларускім бокам больш за 10 гадоў. Лукашэнка спаткаўся з прэзідэнтам Інданезіі Сусілё Бамбанґам Юдаёно, якога таксама запрасілі наведаць Беларусь.

Лукашэнка з прэзідэнтам СінгапураЛукашэнка з прэзідэнтам СінгапураПасля Інданезіі галава Беларусі наведаў Сінгапур, дзе сустрэўся з кіраўніцтвам краіны. Лукашэнка заявіў пра магчымасць продажу Сінгапуру акцыяў беларускіх кампаніяў, у тым ліку «Беларуськалію». 22 сакавіка нечакана для ўсіх Аляксандр Лукашэнка паляцеў не дахаты, а ў адну з найбагацейшых краінаў свету – Аб’яднаныя Арабскія Эміраты. 25 сакавіка, на Дзень Волі, галава Беларусі спаткаўся з намеснікам прэм’ер-міністра, міністрам унутраных справаў ААЭ шэйхам Сайфам бін Заідам ан-Наг’янам, а таксама са спадчынным прынцам эмірату Абу-Дабі шэйхам Мухамэдам бін Заідам ан-Наг’янам. Што яшчэ робіць Лукашэнка ў Эміратах, ахутанае таямніцаю. Існуюць версіі, што паездка Лукашэнкі ў ААЭ – завуаляваны адпачынак.

«Накручванне хвастоў» чыноўнікам?

Палітычны аглядальнік Аляксандр Класкоўскі мяркуе, што Лукашэнка выправіўся ў краіны Азіі, каб, з аднаго боку, «падсілкаваць ідэалагічныя рупары», а з другога – вырашыць пэўныя эканамічныя праблемы Беларусі. Аднак адмысловец кажа пра няпэўныя вынікі ад наведвання Лукашэнкам азіяцкіх краінаў, бо беларуская прадукцыя не вытрымлівае канкурэнцыі на сусветным рынку. «Нават у беднай Інданезіі аддаецца перавага кітайскім прадуктам, – падкрэсліў эксперт. – Інвеставаць у беларускую эканоміку таксама наўрад ці знойдуцца ахвотныя. Ва ўрадах гэтых краінаў не дурныя людзі сядзяць, і ім хопіць «пагугліць» пра нацыяналізацыю «Камунаркі» ды «Спартака», каб даведацца, што інвестыцыйны клімат у Беларусі неспрыяльны».

Паводле адмыслоўцы, галава Беларусі сваймі замежнымі паездкамі можа «накручваць хвасты» беларускім чыноўнікам, каб паказаць, што, «маўляў, прэзідэнт паехаў, прэзідэнт зрабіў». «Аднак на узроўні калгасу нельга кіраваць краінаю», – мяркуе эксперт.

Паводле спадара Класкоўскага, шуканне кіраўніцтвам Беларусі партнёраў на падставе ідэалогіі, поглядаў – хібнае ў сваёй аснове. Паводле адмыслоўцы, пад бокам у Беларусі – краіны Еўразвязу, супраца з якімі можа прынесці нашмат большыя прыбыткі, чымся гандаль з краінамі трэцяга свету.

Максім Ярашэвіч, belsat.eu

Глядзі таксама
Каментары