Адмысловы падарунак для аматараў чытаць з’явіўся на прасторах Байнэту. Гэта сацыяльная сетка для кнігалюбаў, пляцоўка, дзе можна чытаць пра кнігі ды пісаць пра кнігі, дзяліцца ўражаннямі і знаходзіць сяброў. Стваральнікаў сайту абурыла несправядлівасць: у Беларусі, дзе ёсць літаратура, дагэтуль няма асобнага кніжнага сайту.
{movie}Агляд падзеяў культуры (19.03.2013)|right|9763{/movie}
“Гледзячы паводле колькасці наведнікаў на літаратурных фэстах і некаторых кніжных прэзентацыях, можна сказаць, што цікавасць да літаратуры ёсць, хаця яе трэба неяк падаграваць”, – кажа рэдактарка Bookster.by Аляксандра Дорская.
Каб пачаць уласнае літаратурнае жыццё, дастаткова проста зарэгістравацца. Bookster.by запрашае сустракацца букваедаў усіх кшталтаў: чытачоў, пісьменнікаў і літаратурных крытыкаў. Ужо сёння тут можна пачытаць рэцэнзіі на выданні апошніх часоў, інтэрв’ю і пакідаць допісы.
“Для нас ужо піша крытык Ціхан Чарнякевіч, Павел Абрамовіч, Жанна Капуста, Таццяна Заміроўская, – пералічае Дорская. – Адная з нашых асноўных задачаў сёння – знайсці новых аўтараў”.
У распараджэнне карыстальнікаў трапляе і каталог беларускай літаратуры, дапамагаць пашырэнню якога можа кожны: дадаючы свае ўлюбёныя кніжкі.
“У нас будуць кніжныя агляды, інтэрв’ю з пісьменнікамі, рэцэнзіі на беларускія і замежныя навінкі, у чарзе ўжо стаіць некалькі літаратурных прэм’ераў, – кажа Дорская. – Літаральна на вачах чытача будзе перакладацца кніга Макса Фрая “Казкі старой Вільні”. Мы плануем штотыдзень выкладаць па адной казцы ў перакладзе на беларускую мову і ілюстрацыі да яе, атрымаецца такі літаратурны серыял”.
Іншыя тэмы: французскае ды нямецкае кабарэ ад гурта “Серебряная свадьба” ды касмічны канцэрт сінці-поп-трыа “Кассиопея”.
Адэля Дубавец, belsat.eu