Вучэнні «Захад-2013»: Ад каго будзем адстрэльвацца?


Упершыню ў Беларусі адбудуцца вучэнні з удзелам жаўнераў «еўразійскага НАТО» – Калектыўных сілаў аператыўнага рэагавання краінаў АДКБ. Тое, што вучэнні «Захад-2013» рыхтуюцца ў поўнай таямніцы, выклікае непакой у заходніх суседзяў.

Міністэрства абароны Літвы заклікала Беларусь і Расею да большай адкрытасці вучэнняў –гэта адзначыў міністр абароны Літвы падчас сустрэчы з амбасадарам Беларусі. «Літва хацела б, каб Расея і Беларусь былі больш адкрытымі ды інфармавалі пра запланаваныя па суседству буйныя вучэнні, ды прапаноўвае запрашаць на такія вучэнні назіральнікаў з НАТО», – паведамляюць у міністэрстве абароны Літвы.

Раней кіраўнік польскага МЗС Радослаў Сікорскі заявіў, што гэткія вучэнні правакуюць Польшчу. «Мы вельмі сур’ёзна ставімся да гэтага. Апошнія супольныя вучэнні Расеі ды Беларусі «Захад-2009» былі менавіта правакацыйнымі ў дачыненні Польшчы», – заявіў Сікорскі.

У 2009 годзе, паводле «легенды» вучэнняў, беларускія і расейскія вайскоўцы «вызвалялі» ўзятую ў аблогу «ўмоўным праціўнікам» Калінінградчыну. Паводле непацверджанай інфармацыі, сцэнар прадугледжваў таксама… прэвентыўны ядравы ўдар па Варшаве.

Таямнічыя вучэнніБеларусы на вучэннях КСАР АДКБ, фота http://www.odkb-csto.orgБеларусы на вучэннях КСАР АДКБ, фота http://www.odkb-csto.org

Лукашэнка падпісаў план правядзення вучэнняў, аднак для грамадскасці ён застаецца пакуль што закрытым. Не ведаюць падрабязнасцяў і нашыя заходнія суседзі: МЗС Латвіі ды Літвы ўжо выказалі спадзяванні на тое, што беларускі бок усё ж паінфармуе суседзяў пра актыўнасць вайскоўцаў.

Пакуль што не вядома і пра колькасць вайскоўцаў, якія возьмуць удзел у вучэннях. Раней міністр абароны Беларусі Юрый Жадобін заяўляў, што з беларускага боку будуць задзейнічаныя як мінімум упраўленне 103-й асобнай мабільнай брыгады і ўзмоцнены батальён гэтага злучэння. Вядома таксама, што на вучэннях маюць «абкатаць» адзінкі расейскай тэхнікі, мадэрнізаванай у Беларусі.

Вайсковы аналітык газеты «Беларусы і рынак» Аляксандр Алесін мяркуе: арганізацыя вучэнняў, падобных да тых, што былі ў 2009 годзе, не мае вайсковага сэнсу. «Войскі Расеі і Беларусі, разам узятыя, цяпер не ў стане сур’ёзна супрацьстаяць войскам НАТО. Калі толькі Расея не прыменіць ядравай зброі, але ў ядравай вайне няма пераможцаў, – зазначае эксперт. – Такія вучэнні не дапамогуць войскам у спраўднай вайне і не напалохаюць НАТО. Іншая справа – намаляваць у вачах уласнага насельніцтва ворага і з’яднаць грамадзянаў вакол дзейнай улады».

Лукашэнка, падпісваючы план вучэнняў, заявіў, што яны будуць мець абарончы характар і «скіраваныя на ўзмацненне бяспекі Саюзнай дзяржавы». Апошні раз гэткія вучэнні супольна з расейцамі праводзіліся ў 2011 годзе. Падчас вучэнняў «Шчыт Саюзу-2011» адпрацоўвалася ў асноўным адбіванне з паветра.

КСАР – «расейскі паліцэйскі»?

«Легенда» вучэнняў «Братэрства-2012»

«У дзяржаве «С», якая – чалец АДКБ, узнікла крызісная сітуацыя, звязаная з дзеяннямі міжнародных экстрэмісцкіх і тэрарыстычных арганізацыяў ды супрацьстаяннем паміж этнічнымі групоўкамі, якія жывуць у дзяржаве. У краіне распачаліся масавыя закалоты, у гарадах адбыліся пагромы гандлёвых комплексаў і крамаў. Прэзідэнт дзяржавы «С» звярнуўся ў Савет калектыўнай бяспекі АДКБ з просьбаю па дапамогу».

У 2011 годзе Лукашэнка заявіў, што Калектыўныя сілы аператыўнага рэагавання маюць супрацьстаяць спробам пераваротаў у краінах-удзельніцах АДКБ. Аднак Генеральны сакратар АДКБ Мікалай Бардзюжа амаль адразу адрэагаваў: «АДКБ не будзе браць на сябе жандармскіх функцыяў».

Тым не менш у 2012 годзе ў Казахстане з удзелам беларусаў адбыліся вучэнні «Непарушнае братэрства-2012». Задума нядаўніх вучэнняў акурат нагадвае спробу задушэння хваляванняў.

Сёння агульная колькасць Калектыўных сілаў аператыўнага рэагавання складае каля 20 тысяч асобаў з вайсковага кантынгенту і сілаў адмысловага прызначэння. Прыкладна палова кантынгенту – расейцы. Беларусаў у КСАР – каля 2 тыс.

Сучасная зброя ў абмен на лаяльнасцьБеларусь купляе па ільготных коштах зенітна-ракетныя комплексы «ТОР-М2».Фота http://vsr.mil.byБеларусь купляе па ільготных коштах зенітна-ракетныя комплексы «ТОР-М2».Фота http://vsr.mil.by

Лукашэнка неаднаразова падкрэсліваў, што беларускае войска дэ-факта «прыкрывае» Расею на захадзе.

«Мы развіваем рэгіянальную групоўку войскаў Беларусі ды Расеі, аснова якой – беларускае войска. Яе патэнцыял неабходна падтрымліваць на ўзроўні, што забяспечыць адпор любой агрэсіі, адкуль бы яна ні зыходзіла», – заявіў кіраўнік краіны.

Чаго афіцыйны Менск хоча ўзамен? «Ва ўзаемаадносінах Расеі ды Беларусі праз АДКБ мае месца пэўны гандаль: Расея хоча кантраляваць гэтую геапалітычную прастору ў цэнтры Еўропы, што займае Беларусь, але вайсковымі сродкамі яна гэтага зрабіць не можа, – адзначае Аляксандр Алесін. – Адзіная магчымасць – ускосны кантроль, калі Беларусь – хаўруснік для Расеі».

Узамен за хаўрусніцкую лаяльнасць Беларусь атрымлівае сучаснае ўзбраенне расейскай вытворчасці па ільготных коштах ды іншыя прэферэнцыі. Гэтак да канца года Беларусь будзе мець зенітна-ракетны дывізіён, укамплектаваны сучаснымі зенітна-ракетнымі комплексамі «ТОР-М2» па ільготным кошце, а беларускія вайскоўцы бясплатна навучаюцца ў Расеі. Летась у навучальных установах Міністэрства абароны Расеі праходзілі падрыхтаванне больш за 500 беларусаў.

Аднак ці варта ганарыцца такімі прэферэнцыямі? «Бюджэт беларускага войска проста жабрачны. І атрыманне тых жа «ТОР-М2» – гэта спроба прыкрыць з паветра хоць бы галоўныя стратэгічныя аб’екты, у тым ліку і АЭС, якую цяпер будуюць. Узбраенне ў нас савецкае і састарэлае», – канстатуе Аляксандр Алесін.

Зміцер Ягораў, belsat.eu

Глядзі таксама
Каментары