Нацыянальны банк прызнаўся, што апошнім часам не агучвае прагнозаў наконт курсу беларускага рубля. Маўляў, вельмі цяжка зрабіць верагодны прагноз. Пры гэтым агульныя інфляцыйныя спадзяванні ўсё ж такі публікуюцца.
Гэтак, інфляцыя ў 2013 годзе складзе 10–12 %, таксама чакаецца «плаўная» дэвальвацыя рубля. Такую сітуацыю чыноўнікі лічаць «стабільнаю і нармальнаю» пры ўмове, што ўдасца забяспечыць рост ВУП і рэальных даходаў насельніцтва. Аднак падступныя законы эканомікі ў чарговы раз увялі ў зман улады – толькі за першыя два тыдні студзеня інфляцыя склала амаль 2 %.
{movie}Алесь Лукашэвіч у “Гарачым каментары”|left|8701{/movie}
Паводле эканаміста Алеся Лукашэвіча, ужо па першых афіцыйных звестках можна сцвярджаць, што інфляцыйны прагноз Нацбанку не спраўдзіцца і за год яна сягне нават 20 %. «У беларускіх уладаў ёсць імкненне выдаваць жаданае за сапраўднае. Вельмі часта яны выкарыстоўваюць такія дзіўныя звароты – міністр эканомікі казаў пра 8 % ВУП «у выпадку, калі сыдуцца зоркі». Увесь цывілізаваны свет змагаецца з іншаю праблемаю – выклікаць інфляцыю, а Беларусь намагаецца яе панізіць», – заўважае Алесь Лукашэвіч.
Павышэнне інфляцыі патрэбнае для таго, каб знізіць узровень даўгоў, што назапасіліся ў сусветнай эканоміцы. Умоўна кажучы, чым менш каштуе долар, тым менш давядзецца сплочваць за крэдыты. Чаму б гэтак не зрабіць і ў самой Беларусі?
«У нашай краіне парушаныя асноўныя законы рынкавых транзакцыяў – людзі не могуць спакойна гандляваць, не давяраючы беларускай валюце. Таму павелічэнне інфляцыі выкліча рэцэсію беларускай эканомікі», – тлумачыць эксперт.
У.Ш.,belsat.eu