Школа танцу «Grande Rio», якая летась заняла толькі пятае месца сярод школаў самбы, гэтым разам збіраецца ўзяць рэванш. Сёлета танцоры не толькі кардынальна зменяць строі ды платформу для выступу, але і песню – пад гукі самбы ўздымуцца тэмы нафты і карумпаванага ўраду.
Некалькі месяцаў таму парламент гвалтоўна павялічыў падаткі для нафтавых кампаніяў, якія адбілася на заробках працаўнікоў. У лістападзе ў Рыа прайшлі масавыя акцыі пратэсту, аднак закон застаўся без зменаў. Танцоры, шмат хто з якіх або працуе на нафтаздабыўчых і нафтапераапрацоўчых прадпрыемствах, або мае сваякоў, якія працуюць там, – працягнуць пратэст і падчас карнавалу.
«У нас сёлета моцная тэма нафты і ўлады, мы праспяваем аб праблемах Рыа-дэ-Жанэйра. Але, вядома ж, мы таксама пакажам і выдатнае шоу», – зазначае арт-дырэктар школы самбы «Grande Rio» Рабэрту Шанецкі (Roberto Szaniecki).
{movie}Падрыхтоўка да карнавалу ў Рыа|left|8636{/movie}
Мясцовыя школы самбы рыхтуюцца да карнавалу цэлы год, яны распараджаюцца бюджэтамі на мільёны долараў і наймаюць тысячы працаўнікоў. Падчас фестывалю падаецца, што ўся краіна ператварылася ў адную вялікую імпрэзу. Бразільцы звычайна стараюцца браць адпачынкі на гэты час і адкладаць важныя справы.
«Кожная школа самбы выставіць каля 4000 танцораў, што агулам дасць каля 50 тысячаў удзельнікаў. Якое яшчэ шоу вы ўзгадаеце з 75 тысячамі гледачоў і трансляцыяй на 150 краінаў? Гэта вельмі папулярная, вельмі важная імпрэза, якая яднае людзей», – паведамляе прэзідэнт школы самбы «Grande Rio» Эдсон Алівэйра (Edson Oliveira).
Карнавал у Рыа-дэ-Жанэйра распачнецца 9 лютага і працягнецца тры дні.
Усевалад Шлыкаў, belsat.eu
