Яны не падтрымліваюць прапанову эмігранта Уладзіміра Барадача абраць сябраў Каардынацыйнай рады апазіцыі з дапамогаю інтэрнэт-галасавання.
Лябедзька: у мяне ёсць да Барадача прапанова, якая адпавядае ягонаму тэмпераменту
Былы прэм’ер-міністр Міхаіл Чыгір, да якога Барадач таксама звярнуўся з адкрытым лістом, пра яго змест даведаўся з размовы з карэспандэнтам БелаПАН: «Нікуды не збіраюся. Хай усё робяць без мяне. Чаму? Расчараваны. Ды і я ўжо пенсіянер, мне ў гэтым годзе будзе 65 гадоў. Хай адважваюцца маладыя». Ён адзначыў, што раней працаваў з Барадачом, і ў тыя часы палкоўнік «не меў такіх радыкальных поглядаў». Магчыма, на яго паўплываў ад’езд за мяжу, мяркуе экс-прэм’ер.
Былы спікер Вярхоўнага Савету 12-га склікання, старшыня Беларускай сацыял-дэмакратычнай Грамады Станіслаў Шушкевіч заявіў, што яго ідэя Барадача не захапляе, бо «і так больш-менш ясна, што трэба рабіць»: «Каб займацца палітыкаю тут, трэба мець пэўную мужнасць. А абвяшчаць лозунгі, седзячы спакойна за мяжою і карыстаючыся інтэрнэтам, нескладана. Ідэяў можа шмат ўзнікнуць». Перад Новым годам ён сустракаўся з Барадачом у Вільні, але той пра апошнюю ініцыятыву нічога не казаў.
Лідар кампаніі «Гавары праўду!» Уладзімір Някляеў заявіў, што падтрымлівае Барадача ў справе аб’яднання апазіцыі ды стварэння Каардынацыйнай рады. Ён падкрэслівае, што апошні мусіць быць легітымны, а інтэрнэт-галасаванне не можа гэтага забяспечыць.
Што прапанаваў Барадач?
Колькі дзён таму палкоўнік Уладзімір Барадач звярнуўся да кіраўніцтва беларускіх апазіцыйных партыяў і рухаў з заклікам выставіць на інтэрнэт-выбары сваіх прадстаўнікоў, каб стварыць Каардынацыйную раду апазіцыі. У будучыні ён мог бы стаць каардынацыйным органам усіх дэмакратычных сілаў, выпрацаваць адзіную дактрыну, стратэгію і тактыку барацьбы, прапанаваць грамадзянам сацыяльна-эканамічную, палітычную і нацыянальную праграмы выхаду з крызісу і развіцця Беларусі.
Паводле Барадача, выбары дадуць магчымасць задаволіць амбіцыі палітыкаў, паказаць рэйтынг і давер грамадзянаў да ўсіх палітычных структураў і лідараў, аб’яднаць усе сілы, стварыць сістэму і паказаць людзям гатовасць і здольнасць удзельнічаць і ўплываць на працэсы, якія адбываюцца ў краіне.
belsat.eu, паводле БелаПАН