У крамах кажуць, што новых замоваў не было і наўрад ці будуць.
Ахвотныя не могуць набыць кніг паэта, экс-кандыдата на прэзідэнта Уладзіміра Някляева. Яны зніклі з буйных дзяржаўных крамаў.
Пры гэтым кіраўніцтва “Белкнігі”, уладальніцы найбуйнейшай у Беларусі сеткі кнігарняў, адмаўляе факт забароны кніг. Працаўнікі ж крамаў паведамляюць, што апошнія паасобнікі скончыліся яшчэ некалькі месяцаў таму, але з таго часу новых замоваў не рабілі ды наўрад ці зробяць.
Кнігі Някляева можна знайсці ў прыватных гандлёвых пунктах. Як паведамілі працаўнікі інтэрнэт-крамы prastora.by, у іх ёсць зборнік выбраных твораў з серыі “Кнігазбор” і аўдыёкніга з выбранымі вершамі ў аўтарскім выкананні. Апошнім часам попыт на гэтыя тавары падвысіўся. Паэтычны зборнік Някляева на расейскай мове “Окно” ёсць на складах у Маскве. Яго можна замовіць праз інтэрнэт.
Тым часам старшыня Саюза пісьменнікаў Беларусі Мікалай Чаргінец на прэсавай канферэнцыі 13 студзеня назваў Някляева “добрым паэтам”, а ягоны ўдзел у прэзідэнцкай кампаніі — “памылкай”: “Ён мне проста нагадвае кацяня, якое нарадзілася на стайні і стала патрабаваць сабе пашпарт каня”, — сказаў старшыня СПБ.
belsat.eu