Сёння Савет Федэрацыі Расеі аднагалосна прыняў гэтак званы «закон Дзімы Якаўлева», які, сярод іншага, забараняе ўсынаўленне расейскіх дзяцей амерыканскімі грамадзянамі. Раней за прыняцце закону прагаласавалі 420 дэпутатаў Думы і толькі 7 – супраць.
Пра што вядзецца?
Гэта стала адказам на «акт Магніцкага», які прынялі ЗША. Амерыканскі закон уводзіць візавыя і фінансавыя санкцыі супраць дзясяткаў расейскіх чыноўнікаў, датычных смерці ў турме адваката Сяргея Магніцкага. А Дзіма Якаўлеў – двухгадовы расейскі хлопчык, якога ўсынавіла амерыканская сям’я. Ён загінуў чатыры гады таму, калі бацька пайшоў у краму і забыў дзіця ў машыне.
Акрамя забароны ўсынаўляць, закон Якаўлева ўводзіць візавыя санкцыі ды фінансавыя абмежаванні ў дачыненні амерыканцаў, якія парушылі правы расейцаў.
Сябра рады правоў чалавека пры прэзідэнце РФ Юрый Костаў лічыць гэты закон абуральным і ганебным. «Амерыканцы не хочуць бачыць у сябе людзей, якія забілі Сяргея Магніцкага. Няважна, вінаваты ён ці не. Смяротнага пакарання ў нас няма. Адэкватнай рэакцыяй было б самім пакараць іх. Замест гэтага выходзіць, што Расея падтрымлівае тых, хто забіў Магніцкага», – адзначае ён. {movie}Юрый Костаў пра закон Якаўлева|right|8243{/movie}
Рэакцыя грамадства
«Закон Якаўлева» быў прыняты неадназначна: толькі рэдакцыя «Новай газеты» сабрала больш за 100 тыс. подпісаў супраць адказу на «акт Магніцкага». Аднак подпісы гэтыя… згубіліся.
Статыстыка ж няўмольная: пасля развалу СССР амерыканскія грамадзяне ўсынавілі больш за 100 тыс. расейскіх дзяцей, з якіх за апошнія дзесяць гадоў загінулі 19. А ў расейскіх сем’ях за гэты ж час загінулі больш за 1 тыс. усыноўленых дзетак. У выніку палітычных спрэчак забойцы Магніцкага аказаліся пад абаронаю Расеі, а пацярпяць толькі расейскія дзеці.
«Белсат» запытаў жыхароў Масквы, што тыя думаюць пра забарону ўсынаўлення расейскіх дзяцей амерыканцамі.
Падрабязнасці – у відэаматэрыяле. {movie}Апытанне: “закон Якаўлева”|right|8244{/movie}
belsat.eu