«Завяршаецца амністыя, на якую шмат хто ўскладаў спадзяванні. Мы нават атрымлівалі віншаванні, маўляў, неўзабаве Мікола будзе дома… Але нават на самым пачатку амністыі было зразумела, што палітвязняў адмыслова выключылі з працэсу разгляду. Я ніколі на гэтую амністыю не спадзявалася», – заявіла ў інтэрв’ю «Белсату» Марына Адамовіч, жонка палітвязня Мікалая Статкевіча.
Яшчэ перад пачаткам амністыі большасць палітвязняў пачала атрымліваць папярэджанні ад адміністрацыяў вязніц з надуманых прычынаў. У тым ліку і Мікалай Статкевіч, якога прызналі заўзятым парушальнікам рэжыму ды асобаю, схільнаю да ўцёкаў і непадпарадкавання. У самім законе аб амністыі было асобнае палажэнне пра тое, што ўдзельнікі ды арганізатары масавых закалотаў не могуць разлічваць на ранейшае вызваленне.
Статкевіч не скардзіцца{movie}Марына Адамовіч: Статкевіча перавялі ў іншую камеру|right|7602{/movie}
За апошні тыдзень Марына Адамовіч атрымала ад свайго мужа два лісты, а яшчэ Міколу Статкевічу дазволілі затэлефанаваць дадому. «Ён патэлефанаваў 17 лістапада, ягоны голас такі ж, як і раней, – бадзёры, упэўнены, аптымістычны. Ён распавёў пра тое, што ў яго палепшыліся ўмовы, нягледзячы на тое, што ён па-ранейшаму ў следчым ізалятары. Яго перавялі ў іншую камеру; паводле Міколы, яна здаецца крыху большаю і святлейшаю», – гаворыць жонка палітвязня.
Дагэтуль Міколу Статкевіча ўтрымлівалі ў падобнай, але халаднейшай камеры. Паводле Марыны Адамовіч, вязень заўважае, што «прыкметна змянілася сітуацыя ў турме»: цяпер адміністрацыя імкнецца захоўваць нормы закону, а таксама палепшылася якасць хлеба.
Ізаляцыя працягваецца
{movie}Марына Адамовіч: Чаму Статкевіча трымаюць у СІЗА?|left|7601{/movie}Мікалай Статкевіч застаецца апошнім экс-кандыдатам на прэзідэнта, якога трымаюць за кратамі. Ён і надалей адмаўляецца напісаць прашэнне аб памілаванні. Утрымліваюць Статкевіча вось ужо амаль год у следчым ізалятары, хоць гэта незаконна. Гэткім чынам, на думку Адамовіч, адміністрацыя турмы імкнецца ізаляваць палітыка ад іншых вязняў.
«Гэтым вельмі груба парушаецца заканадаўства, бо ў следчым ізалятары асуджаныя вязні могуць быць пакінутыя паводле іх уласнай заявы і з пісьмовай згоды начальніка – зняволеныя з тэрмінамі да 5 гадоў для выканання працаў па абслугоўванні ізалятара, – гаворыць Марына Адамовіч. – У нашым выпадку гэта не мае дачынення да Міколы. Гэта вельмі красамоўнае жаданне не дазволіць нават фантастычнага, як у фільмах, перастуквання, абменьвання інфармацыяй з іншымі вязнямі».
У траўні 2011 года суд Ленінскага раёна Менску прысудзіў Статкевіча да 6 гадоў пазбаўлення волі паводле абвінавачвання ў арганізацыі масавых беспарадкаў у дзень выбараў прэзідэнта 19 снежня 2010 года. Палітык адбываў пакаранне ў Шклоўскай калоніі № 17, аднак 15 студзеня 2012 года яму стварылі больш жорсткія ўмовы ўтрымання, перавёўшы ў следчы ізалятар Магілёва.
belsat.eu
