Жыхары Бабруйску адрэагавалі на прапанову Бяляцкага


Яны сабралі ды накіравалі ў гарвыканкам подпісы з просьбаю прысвоіць вуліцам імёны рэпрэсаваных пісьменнікаў Барыса Мікуліча і Сяргея Грахоўскага.

Сяргей Грахоўскі. Фота kamunikat.orgСяргей Грахоўскі. Фота kamunikat.orgАктывісты дэмакратычных арганізацыяў сабралі 176 подпісаў. Як паведаміла Вольга Піманава, галоўная арганізатарка акцыі, ідэю пераназваць вуліцы падаў праваабаронца Алесь Бяляцкі, які адбывае пакаранне ў бабруйскай турме: “Ён сказаў, што ў нас быў такі Барыс Мікуліч, пісьменнік, рэпрэсаваны, сёлета яму спаўняецца 100 гадоў, і Грахоўскі, які пачынаў сваю працоўную дзейнасць менавіта ў Бабруйску. Спадар Алесь нагадаў, што 2012-ы – Год кнігі, а таксама 75-годдзя сталінскага тэрору: у 1937-м абодвух пісьменнікаў рэпрэсавалі”.

Піманава распавяла, што калі ўшчыльную занялася зборам матэрыялаў пра пісьменнікаў, аказалася, што вялікую працу ў гэтым кірунку ўжо зрабіла бабруйская бібліятэка № 4. Калектыў гэтай бібліятэкі ўжо некалькі гадоў выступае за тое, каб ёй прысвоілі імя Барыса Мікуліча.

Барыс Мікуліч. Фота babruisk.infoБарыс Мікуліч. Фота babruisk.infoПаводле актывісткі, працаўнікі бібліятэкі звязаліся з жыхарамі паселішча Машукоўка ў Сібіры, дзе памёр беларускі пісьменнік, і актыўна з імі лістуюцца: “Адтуль перадалі шмат матэрыялу пра Мікуліча. Яны даглядаюць магілу беларускага пісьменніка – і дзеці, і грамадскія актывісты”.

“У 2002 г. у Машукоўцы адкрылі надмагілле Барысу Мікуліч. Час, расставіўшы ўсё па сваіх месцах, вярнуў нам сумленнае і незаплямленае імя пісьменніка. Мы памятаем пра вас, Барыс Міхайлавіч…” – напісаў настаўнік гісторыі машукоўскай сярэдняй школы Міхаіл Захарцоў у 2007 г. у газеце “Красноярский рабочий”.

“Памятаюць пра яго людзі там, у Расеі, у Сібіры, а ў нас гэтая тэма нават не ўзнімалася, у нас цішыня”, – зазначыла Піманава. Паводле яе, такая сітуацыя і падштурхнула прадстаўнікоў усіх бабруйскіх дэмакратычных арганізацыяў да рашэння падняць тэму рэпрэсаваных пісьменнікаў.

belsat.eu

Глядзі таксама
Каментары