Прадпрымальнікам, якія не згаджаюцца на новыя стаўкі арэнды, адключаюць святло. Абураныя бізнесоўцы распачалі страйк.
Каля 400 прадпрымальнікаў гомельскага гандлёвага цэнтру “Сакрэт” 23 кастрычніка праводзяць аднадзённую акцыю пратэсту. У іх паўстаў канфлікт з новым уласнікам гандлёвага прадпрыемства – ТДА “НП-Сервіс”, які павысіў арэндную плату з 45–55 да 120 еўраў за квадратны метр. {movie}Пратэст прадпрымальнікаў у Гомлі|right|7080{/movie}
Наймальнікі плошчаў абураныя і новымі дамовамі, у якіх прапісаныя “кабальныя ўмовы”. 23 кастрычніка яны не адкрылі сваіх гандлёвых пунктаў, размясціўшы на іх аб’явы “Сандзень” і “Пераўлік”. Прадпрымальнікі сабралі подпісы пад калектыўным зваротам у міліцыю, у якім просяць правесці правяранне паводле факту магчымага махлярства.
Яны пішуць, што новы ўласнік гандлёвага цэнтру выкарыстоўвае ў канфлікце неправавыя метады: пагражае выселіць прадпрымальнікаў, а таксама шантажуе іх – да прыкладу, адключае ў гандлёвых пунктах электрычнасць. Апрача гэтага, сцвярджаюць, што кіраўніцтва падманам пераканала іх скасаваць дамовы.
“Пры новых дамовах, калі мы іх падпішам, то трапляем фактычна ў рабства да ўласніка, ён у любы момант можа проста выкінуць нас на вуліцу. І чым такім нам трэба гандляваць, каб плаціць арэнду 2000 еўраў ці 5000?” – падкрэсліваюць прадпрымальнікі.
Старшыня савету РГА “Перспектыва” Анатоль Шумчанка, які прыехаў у “Сакрэт”, на сходзе заявіў, што юрысты арганізацыі ўважліва вывучылі дакументы, праекты новых дамоваў і прыйшлі да высновы, што яны не адпавядаюць заканадаўству. “Тое, што тут робіцца, калі казаць моваю хвацкіх 1990-х, – гэта проста “кідалава”, – заявіў ён.
На сёння ж у Гомельскім аблвыканкаме запланаваная нарада з прадпрымальнікамі ды ўласнікам “Сакрэту” дзеля ўрэгулявання ставак арэнднай платы. Калі праблема не вырашыцца, арандатары звернуцца ў Гаспадарчы суд.
belsat.eu