Упраўленне ўнутраных справаў Фрунзенскага раёну Менску адмовілася заводзіць крымінальную справу на міліцыянтаў, што збілі фотакарэспандэнта “Associated Press” Сяргея Грыца.
Інцыдэнт адбыўся 18 верасня падчас перадвыбарчага пікету з раздаваннем баршчу “ад Лідзіі Ярмошынай”, які ладзілі актывісты грамадзянскай кампаніі “Гавары праўду!” і яе моладзевага крыла “Zмена”. Удзельнікі акцыі паспелі дастаць рондаль і распаліць газоўку, пасля чаго іх разагналі невядомыя ў цывільным. Пікетоўцаў і журналістаў затрымлівалі з ужываннем грубай сілы. Грыцу разбілі акуляры, паранілі твар. Затрыманых журналістаў неўзабаве адпусцілі, папярэдне выдаліўшы ўсе фота- і відэаматэрыялы.
Раніцаю 19 верасня Сяргей Грыц зноў наведаў Фрунзенскае РУУС, дзе напісаў заяву аб нанясенні яму траўмы і далучыў пяць фатаграфіяў, на якіх зафіксаваны момант затрымання. Здымкі, зробленыя ягонымі калегамі, удалося захаваць ад працаўнікоў міліцыі.
7 кастрычніка журналіст атрымаў афіцыйны адказ з УУС Фрунзенскага раёну, з якога вынікае, што ўпраўленне ўнутраных справаў правяло праверку паводле заявы і “не знайшло ў дзеяннях сваіх працаўнікоў складу злачынства”.
“Далей абскарджваць дзеянні працаўнікоў міліцыі ды дамагацца іх пакарання я не намерваюся, бо ў нашай сістэме правасуддзя гэта не мае сэнсу”, – заявіў журналіст.
belsat.eu