У сталічным парку Горкага адбыўся фестываль стрыт-арту «Вакол свету за 8 гадзінаў».
Восем камандаў з Віцебску, Гомля, Смаргоні ды Менску цягам васьмі гадзінаў стваралі шэдэўры, якія перанеслі гледачоў у Лондан, Парыж, Нью-Ёрк, Шанхай ды іншыя гарады свету.
3D-малюнкі вельмі папулярныя ў краінах Заходняй Еўропы і ў ЗША. У Беларусі падобны від вулічнага мастацтва робіць першыя крокі.
«Я малюю пастэллю. Таксама выкарыстоўваюць акрыл і звычайныя балончыкі з фарбаю. Малюнак 3D атрымліваецца дзякуючы адмысловай тэхніцы, – распавёў мастак Стас. – Выява расцягваецца па шырыні ў самых дальніх канцах, каб у перспектыве скажацца наадварот і адпавядаць прапорцыям».
«Убачылі абвестку ў метро і вырашылі паспрабаваць, – прызналася ўдзельніца фестывалю Яўгенія Краўчанка, якая рэпрэзентуе каманду Белдзяржуніверсітэту. – Тры дні таму пачалі рыхтавацца, і вось сёння намалявалі Райхстаг. Цяжка рабіць 3D-малюнкі, трэба ведаць перспектыву і мець добрую фантазію. Гэта вельмі цікава».
Аўтары найлепшых, на думку журы, працаў атрымалі каштоўныя прызы. Арганізатары фестывалю выказалі надзею зрабіць імпрэзу традыцыйнаю.
belsat.eu