Забойца нанёс 46 нажавых удараў. Следства прыпынілі «у сувязі з невысвятленнем асобы, падлягаючай прыцягненню да крымінальнай адказнасці».
20 кастрычніка спаўняецца 10 гадоў з дня жорсткага забойства беларускай журналісткі Веранікі Чаркасавай.
Журналістку, якая публікавалася ў незалежнай прэсе забілі 20 кастрычніка 2004 ва ўласнай кватэры ў Менску. Забойца нанёс каля 46 нажавых удараў. Яе цела знайшоў 15-гадовы сын і яе айчым.
Следчыя органы заяўляюць, што расследаванне справы па-ранейшаму прыпынена «у сувязі з невысвятленнем асобы, падлягаючай прыцягненню да крымінальнай адказнасці».
Трагедыя адбылася на фоне рэферэндуму, у выніку якога чарговы раз змянілася Канстытуцыя нашай краіны. Пасля чаго Аляксандр Лукашэнка атрымаў магчымасць неабмежаваную колькасць разоў пераабірацца на сваю пасаду.
«Версіі следства не абавязана вам казаць. У расследаванні мы не адкрываем звестак пра следчых, якія вядуць справу», – заявіў у размове з прадстаўнікамі «БАЖ» галоўны інспектар па інфармацыі і сувязям з грамадскасцю Следчага камітэта па Менску Аляксандр Герасімаў.
Да жалобнай даты з дапамогай беларускіх праваабарончых арганізацыяў быў перавыдадзены зборнік найлепшых публікацый Веранікі «Красным по белому», які ўпершыню пабачыў свет у 2005 годзе.
А 21 кастрычніка ўвечары ў Менску адбудзецца вечарына і канцэрт памяці журналісткі з удзелам беларускіх музыкаў.
Падрабязнасці па тэлефоне (029) 126-70-98.