У навагоднюю ноч Вячаслаў Касінераў зладзіў феерверк пад сценамі ізалятару на Валадарскага. Цяпер ён сам – за гэтымі кратамі. Крымінальную справу на актывіста завялі за іншы перформанс – супраць бясчынстваў міліцыянтаў. У сярэдзіне сакавіка ён накінуў пятлю на шыю бронзаваму гараднічаму часоў Расейскай імперыі, усталяванаму нядаўна каля Міністэрства ўнутраных справаў. Праваабаронцы прызналі: пераслед паводле крымінальнага кодэксу за гэта – захада непрапарцыйная.
Тым не менш, суд Маскоўскага раёну сталіцы сёння адхіліў скаргу Касінерава датычна захады стрымання: актывіста пакінулі пад вартаю.
«Мы бачым 100-адсоткава палітычны пераслед актывіста. Была справа, калі хтосьці ў нецвярозым стане зрабіў тое ж самае. Ён накінуў пятлю на шыю гэтаму ж гарадавому – і яму далі толькі содні пасядзець», – зазначыла сяброўка палітвязня Марына Насенка.
Сярод якіх, апроч цэнтру «Вясна», «Беларускі хельсінкскі камітэт», Беларуская асацыяцыя журналістаў ды ПЭН-цэнтр. Паводле іх, акцыю з гарадавым варта лічыць распаўсюджаннем ідэяў шляхам мастацкіх сродкаў.
Абсурдна завышаную ўвагу да помніку, які адкрываў кіраўнік МУСу Ігар Шуневіч, адчулі нарадзінец Менску Яўген Грыневіч ды ягоны сабака Бруна. Праўда, за зусім не мастацкі ўчынак.
«Мы пайшлі з мамай на вечаровую прагулку, і акурат праходзілі ля гарадавога. Як вы ведаеце, там акрамя гарадавога яшчэ сабачка, адліты ў бронзе. Бруна зацікавіўся сваім калегам і хутка падняў лапку і памеціў яго. Да нас падбег малады міліцыянт, які хацеў нас затрымаць і сказаў, што мы зняважылі помнік», – узгадвае гаспадара сабакі.
Калі Яўген і Бруна абышліся лёгкім спалохам, то Вячаславу Касінераву пагражае зняволенне на тэрмін да трох гадоў або арышт да шасці месяцаў. Раней актывіст ужо атрымліваў штраф у гучнай «справе графіцістаў» ды адседзеў 15 дзён за ўдзел у пратэсце 17-га лютага. Суд за «паліцыянта» адбудзецца напрыканцы красавіка.
Марына Вашкевіч, «Белсат»